ରାଜଧାନୀ ଛାତି ଉପରେ ଜବରଦଖଲ
ମୁଖ୍ୟକଥା ହେଲା ସରକାରୀ କ୍ବାଟରରେ ବେଧଡ଼କ ବ୍ୟବସାୟ ଚାଲିଥିଲା, କିଏ କନଭେନସନ ହଲ ଓ କନଫରେନସ୍ ରୁମ୍ କରି ମୋଟା ଅଙ୍କର ଭଡ଼ା ଆଦାୟ କରୁଥିଲା ତ ଆଉ କିଏ କରିଥିଲା ଫଳ ଗୋଦାମ କିଏ କ୍ୟାଟେରିଂ ବ୍ୟବସାୟ ପେଣ୍ଠସ୍ଥଳି କରିଥିଲା ତ ଆଉ କିଏ ଫର୍ଣ୍ଣିଚର ତିଆରି କାରଖାନା ଚଳାଇଥିଲା । କେବଳ ସେତିକ ନୁହେଁ ସିମେଣ୍ଟ ଗୋଦାମ ସହ କିଛି ବାଂଲାଦେଶୀ ମଧ୍ୟ ଘର ମାଡ଼ିବସିଥିବା ନଜରକୁ ଆସିଥିଲା । ଏହି ଘଟଣା ରାଜଧାନୀ ଭୁବନେଶ୍ୱରରେ ଘଟିଥିବାବେଳେ ସାଧାରଣ ପ୍ରଶାସନ ବିଭାଗ ଓ ଆର ଆଣ୍ଡ ବି ଡିଭିଜନ ସବୁଜାଣି ଚୁପ ବସିଥିଲା ଏ ସମ୍ପର୍କରେ ପଚାରିବାରୁ ଉଭୟଙ୍କ ମଧ୍ୟରେ ଦୋଷ ଠେଲା ଠେଲି ହୋଇଛନ୍ତି ।
କ୍ବାଟର ପିଛା ଭଡ଼ା ୧୦ ହଜାର
ଭଡ଼ା ଦେଇ ଦଲାଲ ମାସିକ ଟଙ୍କା ନେଉଥିଲେ
ବନ୍ଦ ଥିବା କ୍ବାଟରକୁ ଜଉ ମୁଦ ଦେଇ ସିଲ କରାଗଲା
ଭୁବନେଶ୍ବର,
ଭୁବନେଶ୍ୱରରେ ଜବରଦଖଲ ହୋଇଥିବା ସରକାରୀ କ୍ୱାଟରରୁ ଉଚ୍ଛେଦ ହୋଇଛି । ଦୀର୍ଘଦିନ ଧରି ଜବରଦଖଲ କରାଯାଇଥିବା ସରକାରୀ ଘରଗୁଡିକୁ ବିଡିଏ ଉଚ୍ଛେଦ କରିଛି । ମଙ୍ଗଳବାର ବିଡିଏ ଏନଫୋର୍ସମେଣ୍ଟ ଟିମ ଏସବୁର ଯାଞ୍ଚ କରି ଉଚ୍ଛେଦ କରିଛି । ବିଡିଏ ସମେତ ଓପିଟିସିଏଲ୍, ୱାଟକୋ, ଜିଏ, କମିସନରେଟ ପୋଲିସ, ଆରଆଣ୍ଡବି ଓ ପୂର୍ତ୍ତ ବିଭାଗର ମିଳିତ ସହଯୋଗରେ ଏହି ଉଚ୍ଛେଦ କରାଯାଇଛି । ରାଜମହଲରୁ ମାଷ୍ଟର କ୍ୟାଣ୍ଟିନ ଯିବା ରାସ୍ତାରେ ଥିବା ଏହି କ୍ୱାର୍ଟରଗୁଡିକ ଥିବାବେଳେ ଦଶନ୍ଧି ହେବ ଏହାଭଡ଼ାରେ ଲାଗିଥିବା ଅଭିଯୋଗ ହୋଇଛି । ଦୀର୍ଘ ଦିନ ଧରି ବାହାରୁ ବନ୍ଦ ପଡିଥିବାମନେ ହେଉଥିବାବେଳେ ୟା ଭିତରେ ବିଭିନ୍ନ ବ୍ୟବସାୟ ଚାଲିଥିବା ସାମ୍ନାକୁ ଆସିଛି ।
କିଏ ନିଜର ଦୋକାନ ବଜାର କାମ କରୁଛନ୍ତି ତ ଆଉ କିଏ ଏଠି ପରିବାର ନେଇ ରହୁଛନ୍ତି । ରାଜମହଲ ଛକକୁ ଲାଗିଥିବା ବେତ ଦୋକାନର ବେତ ତିଆରି ଜିନିଷ ଏଠାରେ କାମ ଚାଲିଛି। ଏମିତିକି ଅନେକ ଲୋକଙ୍କ ପାଖରୁ ଭଡା ନେଇ ଘର ଯୋଗାଇ ଦିଆଯାଇଥିବା ଭଡା ଦେଉଥିବା ଲୋକ କହିଛନ୍ତି। ମିଳିଥିବା ତଥ୍ୟ ଆଧାରରେ ଭୁବନେଶ୍ୱରରେ ପାଖାପାଖି ୯୦ରୁ ଊର୍ଦ୍ଧ୍ବ କ୍ୱାର୍ଟର ବର୍ତ୍ତମାନ ଜବରଦଖଲରେ ଅଛି । ପ୍ରାଥମିକ ପର୍ଯ୍ୟାୟରେ ମଙ୍ଗଳବାର ପ୍ରଥମ ପର୍ଯ୍ୟାୟରେ ୭ଟି କ୍ୱାର୍ଟର ଉଚ୍ଛେଦ ହୋଇଛି । ଆଗକୁ ଅନ୍ୟାନ୍ୟ ଜବରଦଖଲ କ୍ୱାର୍ଟରକୁ ଉଚ୍ଛେଦ କରାଯିବ ବୋଲି ବିଡିଏ ଏନଫୋର୍ସମେଣ୍ଟ ଅଧିକାରୀ କହିଛନ୍ତି।
ଅନ୍ୟପକ୍ଷରେ ଏଠାରେ ଭଡ଼ାରେ ଦୁଇମାସ ହେଲା ରହିଥିବା ଜଣେ ମହିଳା ଆଡ଼ଭାନ୍ସ ଦେଇ ରହୁଥିବା କହିଛନ୍ତି ଓ ଏଠାରୁ ହଠାତ ବାହାର କରିଦେଲେ କୁଆଡେ ଯିବୁ ବୋଲି ପ୍ରଶ୍ନ କରିଛନ୍ତି। ଭୁବନେଶ୍ୱର ମାର୍କେଟ୍ ବିଲ୍ଡିଂ ନିକଟ ୟୁନିଟ-୨ ଅଞ୍ଚଳରେ ପ୍ରାୟ ୯୦ ସରକାରୀ କ୍ବାଟରକୁ ବର୍ଷ ବର୍ଷ ଧରି କିଛି ଅସାମାଜିକ ବ୍ୟକ୍ତି ମାଡ଼ି ବସିଛନ୍ତି । ୨୦୨୩ରେ ରିନୋଭେସନ୍ ପାଇଁ ୟୁନିଟ-୨ ଓ ଏହା ପାଖାପାଖି ଅଞ୍ଚଳରେ ଥିବା ୨୧୦ ସରକାରୀ କ୍ବାର୍ଟରକୁ ଚିହ୍ନଟ କରାଯାଇଛି । ଦୀର୍ଘଦିନ ଧରି ଏସବୁ କ୍ବାର୍ଟର୍ସ ମରାମତି ନହୋଇ ଖାଲି ପଡ଼ିବାରୁ ଏହାକୁ କିଛି ଖଳ ପ୍ରକୃତିର ଲୋକ ମାଡ଼ି ବସିଥିଲେ ।
ସରକାରଙ୍କ ନାକ ତଳେ ତଥା ରାଜଧାନୀର ଛାତି ଉପରେ ଥିବା ଏ ମୂଲ୍ୟବାନ ଜାଗାରେ ଗୋଟିଏ ପରେ ଗୋଟିଏ କ୍ବାର୍ଟର ତାଲା ଭାଙ୍ଗି ମାଡ଼ି ବସି ନିଜେ ରହିବା ସହ କିଛି ଲୋକ ଅନେକ ଘରକୁ ଭଡ଼ାରେ ଲଗାଇଥିଲେ । ପ୍ରାୟ ୯୦ରୁ ଅଧିକ କ୍ବାର୍ଟରକୁ ନିଜ ଅଧିକାରକୁ ନେଇ ବହୁ ବ୍ୟକ୍ତି ବ୍ୟବସାୟରେ ଲଗାଇ ଦେଇଥିଲେ। ମଙ୍ଗଳବାର ହଠାତ ଧରପଗଡ଼ କରାଯାଇ କ୍ବାଟର ଖାଲି କରିବାକୁ ମିଳିତ ଚଢାଉ ପରେ ଅନଧିକୃତ ମାଲିକ ଘର ଖାଲି କରିଛନ୍ତି। ଜବରଦଖଲ ଉଚ୍ଛେଦ ସହ ଜବରଦଖଲକାରୀଙ୍କୁ ଉଚ୍ଛେଦକାରୀ ଟିମ୍ ପଚରାଉଚରା କରିଥିଲେ।
ସାଧାରଣ ପ୍ରଶାସନ ବିଭାଗର ଏନଫୋର୍ସମେଣ୍ଟ ଟିମ, ଆର ଆଣ୍ଟ ବିର ଟିମ ଓ ବିଡିଏର ଏନଫୋର୍ସମେଣ୍ଟ ଟିମ ମିଳିତ ଭାବେ ଜବଦଖଲକାରୀଙ୍କୁ ଘରୁ ବାହାର କରିଥିଲେ । ଉଚ୍ଛେଦ ସମୟରେ ଅନେକ କ୍ବାଟରରେ ତାଲା ପଡ଼ିଥିବାରୁ ଏହାକୁ ଭାଙ୍ଗି ପ୍ରଶାସନ ନୂଆ ତାଲା ପକାଇଛି। ଏସବୁ କ୍ବାଟରରୁ ବେଆଇନ ବିଜୁଳି ଓ ପାଣି ସଂଯୋଗକୁ ମଧ୍ୟ ବିଚ୍ଛିନ୍ନ କରିଦିଆଯାଇଛି । କ୍ବାର୍ଟର ନମ୍ବର ଭିଏ-୩୫/୧, ୨, ୩, ୪ ଓ ଭିଏ ୨୨/୩, ୪ ଏବଂ ଭିଏ ୨୪/୨କୁ ଜଉ ମୁଦ ଦେଇ ସିଲ୍ କରାଯାଇଛି ।
ଜବରଦଖଲକାରୀ କିଏ
ବିଭାଗୀୟ-ଆଇନଗତ କାର୍ଯ୍ୟାନୁଷ୍ଠାନ ନାହିଁ
ରାଜମହଲରୁ ମାଷ୍ଟରକ୍ୟାଣ୍ଟିନ ଅଞ୍ଚଳରେ ସରକାରୀ ଜମି ଉପରେ ଥିବା ସରକାରୀ କ୍ବାଟର ଉପରେ କିଏ ଜବରଦଖଲ କରିଥିଲା। ୯୦ରୁ ଊର୍ଦ୍ଧ୍ବ କ୍ବାଟର ଫାଙ୍କା ଥିବାବେଳେ କିଏ ଏହାକୁ ନିଜ ଅକ୍ତିଆରକୁ ନେଇ ଭଡ଼ାରେ ଲଗାଇଥିଲା ଓ ଏହାର ଅର୍ଥ ହଡ଼ପ କରୁଥିଲା ସେନେଇ ଏବେ ମଧ୍ୟ ଖୁଲାସା ହୋଇ ପାରୁନାହିଁ। ନା ପୋଲିସ୍, ନା ଜିଏ, ନା ପୂର୍ତ୍ତ, ନା ଆରଆଣ୍ଡବି ନା ବିଏମସି କେହି ମଧ୍ୟ ଜବରଦଖଲକାରୀ କିଏ ତାକୁ ସାମ୍ନାକୁ ଆଣୁନାହାଁନ୍ତି । ଯାହା ବିଭାଗୀୟ କର୍ତ୍ତୃପକ୍ଷ ଓ ଜବରଦଖଲକାରୀଙ୍କ ମଧ୍ୟରେ ମଧୁଚନ୍ଦ୍ରିକାକୁ ଦର୍ଶାଉଛି।
