ନୂଆପଡ଼ା ଉପନିର୍ବାଚନରେ ଶୋଚନୀୟ ପରାଜୟ ପରେ ବିଜେଡିରେ ବରିଷ୍ଠ ନେତାଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ବରିଷ୍ଠ ନେତାମାନେ ଦଳର ପରିଚାଳନା ଶୈଳୀକୁ ନେଇ ପ୍ରଶ୍ନ ଉଠାଉଥିବାବେଳେ ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ ‘ବରିଷ୍ଠ ନାଗରିକ ପ୍ରକୋଷ୍ଠର ଉପସଭାପତି ପାହ୍ୟା’ ପଦବୀକୁ ପ୍ରାୟ ୬ ମାସ ପରେ ପ୍ରତ୍ୟାଖ୍ୟାନ କରି ଦେଇଛନ୍ତି। ଏହି ପଦବୀ ବା ନିଯୁକ୍ତି ତାଙ୍କ ପାଇଁ ‘ଅପମାନଜନକ’ ବୋଲି କହି ଦେବାଶିଷ ଏହାକୁ ଗ୍ରହଣ କରିପାରୁନଥିବା ଦଳର ସଭାପତି ନବୀନ ପଟ୍ଟନାୟକଙ୍କୁ ଚିଠି ଲେଖି ଜଣାଇଛନ୍ତି। ନବୀନଙ୍କୁ ଲେଖିଥିବା ଚିଠିରେ ଶ୍ରୀ ସାମନ୍ତରାୟ ଗତ ମେ’ମାସରେ ତାଙ୍କୁ ମିଳିଥିବା ‘ବରିଷ୍ଠ ନାଗରିକ ପ୍ରକୋଷ୍ଠର ଉପସଭାପତି ପାହ୍ୟା’ ପଦବୀକୁ ଗ୍ରହଣ କରିବାକୁ ନିଜର ଅସମର୍ଥତା ବ୍ୟକ୍ତ କରିଛନ୍ତି। ଏପରି ପଦବୀଗୁଡ଼ିକ ଅମଲାତାନ୍ତ୍ରିକ ଭଳି ଶୁଣାଯାଉଛି ଓ ଦୀର୍ଘବର୍ଷ ଧରି ଦଳ ପାଇଁ କାମ କରିଥିବା ବରିଷ୍ଠ ବିଜୁପ୍ରେମୀ ତଥା ବିଜୁ ବାବୁଙ୍କ ପ୍ରତି ଅନୁଗତ ନେତାମାନଙ୍କୁ ଏହିପରି ‘ପାହ୍ୟାରେ’ (ଉପସଭାପତି ପାହ୍ୟା) ପଦବୀ ଦେବା ଅପମାନଜନକ ବୋଲି ସେ ଉଲ୍ଲେଖ କରିଛନ୍ତି। ସେ ଆହୁରି ଲେଖିଛନ୍ତି ଯେ, ବିଜେଡିରେ ପ୍ରବାଦ ପୁରୁଷ ବିଜୁ ବାବୁ କିମ୍ବା ଆପଣଙ୍କ ଅନୁଗତଙ୍କ ସ୍ଥାନ ଥିବା ମୋର ସନ୍ଦେହ ହେଉଛି। ବିଜୁ ଲିଗାସୀଠାରୁ ଦୂରେଇ ଏହି ଦଳ ଅନ୍ୟ ଚିନ୍ତାଧାରା, ଆଦର୍ଶ ଓ କାର୍ଯ୍ୟକ୍ରମକୁ ଆପଣାଇଛି। ଆପଣଙ୍କ ପ୍ରତି ଶ୍ରଦ୍ଧା ଓ ଆନୁଗତ୍ୟ ସତ୍ତ୍ୱେ ଦଳର ଏହି ନୂଆ କାର୍ଯ୍ୟଧାରା ମୋତେ ବ୍ୟଥିତ କରିଛି। କେବଳ ମୁଁ ନୁହେଁ, ବିଜେଡିର ହଜାର ହଜାର କର୍ମୀଙ୍କ ଆପଣ ଆଶାବାଡ଼ି। ମୁଁ ଦୃଢ଼ ନିଶ୍ଚିତ ଯେ ଆପଣଙ୍କ ନେତୃତ୍ବରେ ଆମେ ଲକ୍ଷ ଲକ୍ଷ ଓଡ଼ିଶାବାସୀଙ୍କର ବିଶ୍ବାସ ଫେରିପାଇବା। ଗତ ସାଧାରଣ ନିର୍ବାଚନରେ ଦଳ ବିପର୍ଯ୍ୟୟର କାରଣ ଖୋଜାଗଲା ନାହିଁ କି ନିରାକରଣ ହେଲା ନାହିଁ। ପାଟି ଖୋଲି କିଏ କୁହନ୍ତୁ ନ କୁହନ୍ତୁ ବିଜେଡି ବିପର୍ଯ୍ୟୟର କାରଣ ସମସ୍ତଙ୍କୁ ଜଣା। ମାତ୍ର ଦଳ ଏ ପର୍ଯ୍ୟନ୍ତ ବାସ୍ତବତାକୁ ଗ୍ରହଣ କଲା ନାହିଁ। ନିର୍ବାଚନରେ ଜୟ ପରାଜୟ ବଡ଼ କଥା ନୁହେଁ। ମାତ୍ର ଜଣେ ଲୋକପ୍ରିୟ ମୁଖ୍ୟମନ୍ତ୍ରୀ ଏଭଳି ହାରିବା କଥାକୁ ସହଜରେ ଗ୍ରହଣ କରି ହେଉନାହିଁ। ଦଳକୁ ଦୁର୍ବଳ କରିବାକୁ ଉଦ୍ୟମ କରୁଥିବା ଯେକୌଣସି ଶକ୍ତିଙ୍କୁ ପ୍ରତିରୋଧ କରିବେ ବୋଲି ଆଶା। ଆପଣ ଚାହିଁଲେ ଦଳ ମଜଭୁତ ରହିପାରିବ। ଦଳର ଆଭ୍ୟନ୍ତରୀଣ ପରିଚାଳନା ଶୈଳୀ ଉପରେ ଅଙ୍ଗୁଳି ଉଠାଇ ଗଣମାଧ୍ୟମ ଆଗରେ ଅସନ୍ତୋଷ ଝାଡିଛନ୍ତି । ସେ କହିଛନ୍ତି ଯେ, ବିଜେଡି ଆଉ ପୂର୍ବଦଳ ହୋଇ ରହିନାହିଁ। ଏହା ବ୍ୟୁରୋକ୍ରାଟିକ୍ ଦଳ ହୋଇଯାଇଛି। ଏବେ ବି ଦଳକୁ ଭିକେ ପାଣ୍ଡିଆନ୍ ଚଳାଉଛନ୍ତି। ବିଜୁ ବାବୁଙ୍କ ଆଦର୍ଶରେ ଆଉ ଦଳ ପରିଚାଳିତ ହେଉନାହିଁ। ୱାକଫ୍ ବିଲ୍ରେ ଯାହା ଘଟିଗଲା ତାହା ଦୁର୍ଭାଗ୍ୟଜନକ। ସଂସଦରେ ଆମକୁ ଭୀଷଣ ଅପମାନିତ ହେବାକୁ ପଡ଼ିଲା। ନବୀନ ବାବୁଙ୍କୁ ଫୋନ୍ କରି ଏ ବିଷୟ ଜଣାଇଥିଲି। ସେ ଦେଖା ହେବାକୁ କହିଥିଲେ। ମାତ୍ର ସେବେଠାରୁ ତାଙ୍କ ପାଖ ମଡ଼ାଇ ଦିଆଯାଉନାହିଁ। ସ୍ବାସ୍ଥ୍ୟ ଆଳରେ ମୋତେ ଦେଖା କରାଇ ଦେଉନାହାନ୍ତି। ନବୀନ ବାବୁ ନୂଆପଡ଼ା ପ୍ରଚାରକୁ ଗଲେ, ମୋତେ ଦେଖା ଦେବାରେ ଅସୁବିଧା କ’ଣ ବୋଲି ସେ ପ୍ରଶ୍ନ କରିଛନ୍ତି। ଏଥିସହ ଦଳକୁ ପରିଚାଳନା କରୁଥିବା ବ୍ୟକ୍ତିବିଶେଷ ଓ ହାରୁ ନେତାଙ୍କ ଉପରେ ସେ ବର୍ଷିଛନ୍ତି। ନିର୍ଦିଷ୍ଟ ଭାବେ ନବୀନଙ୍କ ବ୍ୟକ୍ତିଗତ ସଚିବ ବରିଷ୍ଠ ଓଏଏସ୍ ଅଫିସର ଆଦିତ୍ୟ ମହାପାତ୍ରଙ୍କ ନାଁ ନେଇ ଶ୍ରୀ ସାମନ୍ତରାୟ କହିଛନ୍ତି ଯେ, ଭୈରବ (ଭିକେ ପାଣ୍ଡିଆନ) ଏବେ ସେଠାରେ ତାଙ୍କର ଜଣେ ‘ପାଲତୁ’ ଆଦିତ୍ୟ ମହାପାତ୍ରଙ୍କୁ ଛାଡ଼ିଛନ୍ତି। ଯିଏ ସେଠାରେ ଦଳୀୟ କଥାରେ ହସ୍ତକ୍ଷେପ କରୁଥିବା ଦେବାଶିଷ କହିଛନ୍ତି। କୌଣସି ବ୍ୟୁରୋକ୍ରାଟିକ୍ ପଦବୀ କିମ୍ବା ପାହ୍ୟାରେ ଥିବା ପଦବୀ ତାଙ୍କ ପାଇଁ ଗ୍ରହଣୀୟ ନୁହେଁ, ସେ ବିଜେଡିର ଜଣେ ସାଧାରଣ କର୍ମୀ ଭାବେ କାର୍ଯ୍ୟ କରିବେ। ବିଜୁ-ନବୀନଙ୍କ ଚିନ୍ତାଧାରା ଓ କାର୍ଯ୍ୟଧାରା ପ୍ରତି ସବୁବେଳେ ପ୍ରତିବଦ୍ଧ ରହିବେ। ନବୀନ ପଟ୍ଟନାୟକ ନେତୃତ୍ବ ନେଉଥିବା ପର୍ଯ୍ୟନ୍ତ ସେ ବିନା ଦ୍ବିଧାରେ ବିଜେଡିରେ ରହି କାର୍ଯ୍ୟ କରିବେ ବୋଲି ସେ ସ୍ପଷ୍ଟ କରିଛନ୍ତି। ଅନ୍ୟପକ୍ଷରେ ବିଜେଡିର ବରିଷ୍ଠ ନେତା ଭୂପିନ୍ଦର ସିଂ କହିଛନ୍ତି ଯେ, ବିଜୁ ବାବୁଙ୍କ ନାଁରେ ବିଜେଡି ଗଠନ ହୋଇଛି। ହେଲେ ତାଙ୍କ ଆଦର୍ଶରେ ଦଳ ଚାଲୁନି। ୨୦୨୪ ସାଧାରଣ ନିର୍ବାଚନରେ ବିଜୁ ବାବୁଙ୍କ ଫଟୋ ମଧ୍ୟ ରଖାଗଲାନି। ଯେଉଁମାନେ ଏବେ ଦଳ ପରିଚାଳନା କରୁଛନ୍ତି, ସେମାନେ ବିଜୁ ବାବୁ ଓ ନବୀନ ବାବୁଙ୍କ ନାଁକୁ ଲିଭାଇ ଦେବାକୁ ଚେଷ୍ଟା କରୁଛନ୍ତି। ଏପରି ହେଲେ ଲୋକେ ଆଉ ବିଜେଡିକୁ ଗ୍ରହଣ କରିବେ ନାହିଁ ବୋଲି ସେ ଚେତାବନୀ ଦେଇଛନ୍ତି। ଦଳର ଭବିଷ୍ୟତ ପାଇଁ ଓ ବର୍ତ୍ତମାନ ପରିସ୍ଥିତିକୁ ସୁଧାରିବା ଲାଗି ଦଳର ସଭାପତି ନବୀନ ବାବୁ ନିଜେ ହସ୍ତକ୍ଷେପ କରିବାର ଆବଶ୍ୟକତା ରହିଛି। ବରିଷ୍ଠ ବିଜେଡି ନେତା ପ୍ରସନ୍ନ ଆଚାର୍ଯ୍ୟ କହିଛନ୍ତି ଯେ, ଦେବାଶିଷଙ୍କ ଚିଠି ପଢ଼ିନି। ସବୁ ପରିବାରରେ ମନାନ୍ତର ଥାଏ। ବୁଝି ବିଚାରି କାମ କଲେ ଭଲ। ଦଳରେ ଅନେକ ପ୍ରସଙ୍ଗକୁ ନେଇ ଭିନ୍ନ ଭିନ୍ନ ମତ ଥାଏ। ସେଥିରୁ ଗୋଟିଏ ମତକୁ ନେଇ ଦଳ ଆଗକୁ ଯାଏ।
ବିଜୁ ଓ ନବୀନଙ୍କ ନାଁକୁ ଲିଭାଇ ଦେବାକୁ ଚେଷ୍ଟା ହେଉଛି : ଭୂପିନ୍ଦର ସିଂ
