ଅରବିନ୍ଦଙ୍କ ବିରୋଧରେ କାର୍ଯ୍ୟାନୁଷ୍ଠାନ ସସପେନ୍ସ 

ନବୀନଙ୍କର ଏହି ଅପ୍ରତ୍ୟାଶିତ ନିଷ୍ପତ୍ତି ବିଜେଡି ରାଜନୀତିରେ ହଟଚମଟ ସୃଷ୍ଟି କରିଛି । ସନା ମହାକୁଡ଼ଙ୍କ ଦଳବିରୋଧୀ କାର୍ଯ୍ୟ ଜଣାପଡୁଥିଲେ ମଧ୍ୟ ଅରବିନ୍ଦ ମହାପାତ୍ରଙ୍କ ବିରୋଧରେ କାର୍ଯ୍ୟାନୁଷ୍ଠାନ ସମସ୍ତଙ୍କୁ ଆଶ୍ଚର୍ଯ୍ୟଚକିତ କରିଛି । ନିର୍ଦ୍ଦିଷ୍ଟ ଭାବେ ତାଙ୍କର ଦଳବିରୋଧୀ କାର୍ଯ୍ୟ ସ୍ପଷ୍ଟ ହୋଇନାହିଁ । ପାଟକୁରାରୁ ବିଜେଡି ଟିକେଟରେ ପ୍ରଥମ ଥର ପାଇଁ ନିର୍ବାଚନ ଲଢ଼ି ସେ ବିଧାୟକ ହୋଇଛନ୍ତି । ଗୋଟିଏ ସମୟରେ ନବୀନଙ୍କର ପରମ ମିତ୍ର ଏବେ ଶତ୍ରୁ  ବିଜୟ ମହାପାତ୍ରଙ୍କର ସେ ପୁଅ ହୋଇଥିଲେ ମଧ୍ୟ ଗତ ନିର୍ବାଚନରେ ବିଜେଡି ତାଙ୍କୁ ଟିକେଟ୍ ଦେଇଥିଲା । ନବୀନଙ୍କ ଆଶୀର୍ବାଦ ପାଇଁ ନବୀନ ନିବାସ ଯାଇଥିବା ଅରବିନ୍ଦଙ୍କୁ ନବୀନ ବହୁତ ଆଦର କରିଥିଲେ । ବାପା(ବିଜୟ ମହାପାତ୍ର)ଙ୍କ ବିଷୟରେ ପଚାରିଥିଲେ ।

ବିଧାନସଭାରେ ବିଭିନ୍ନ ପ୍ରସଙ୍ଗରେ ଅରବିନ୍ଦଙ୍କର ଉପସ୍ଥାପନା ଖୁବ୍ ସୁନ୍ଦର । ବୁଲେଇ ବଙ୍କେଇ ତୀର ମାରିବାରେ ସେ ତାଙ୍କର ଦକ୍ଷତା ପ୍ରତିପାଦନ କରିଛନ୍ତି । ବିଧାନସଭାରେ ସେ ବିଭିନ୍ନ ସମୟରେ ବର୍ତ୍ତମାନର ସରକାରଙ୍କୁ ଘେରିବା ସହ ବିଜେଡି ସରକାରକୁ ପ୍ରଶଂସା କରୁଥିଲେ। ଅରବିନ୍ଦଙ୍କ ଉପରେ କାର୍ଯ୍ୟାନୁଷ୍ଠାନ ଅନେକଙ୍କୁ ଆଚମ୍ବିତ କରିଛି। ତାଙ୍କ ବାପାଙ୍କ ରାଜନୈତିକ କାର୍ଯ୍ୟକଳାପ ଓ ବିଭିନ୍ନ ଦଳର ନେତାଙ୍କ ସହ ସମ୍ପର୍କ ପାଇଁ ଅରବିନ୍ଦଙ୍କୁ ବିଜେଡି ନିଲମ୍ବନ କଲା ବୋଲି ରାଜନୈତିକ ମହଲରେ ଆଲୋଚନା ହେଉଛି। ହେଲେ ବିଜେଡିର ଯୁକ୍ତି ହେଉଛି- ଦୁର୍ନୀତିଗ୍ରସ୍ତ ଓ ବିଶ୍ବାସଘାତକଙ୍କ ପାଇଁ ଦଳରେ ସ୍ଥାନ ନାହିଁ।

କେନ୍ଦୁଝର ରାଜନୀତିରେ ସନାତନ ମହାକୁଡ଼ ଜଣେ ଚର୍ଚ୍ଚିତ ନେତା। ୨୦୧୪ରୁ ୨୦୧୯ ପର୍ଯ୍ୟନ୍ତ ସେ ଚମ୍ପୁଆର ସ୍ବାଧୀନ ବିଧାୟକ ଥିଲେ। ୨୦୧୯ ନିର୍ବାଚନରେ ସେ ନିର୍ବାଚନ ନ ଲଢ଼ି ବିଜେଡିକୁ ସମର୍ଥନ କରିଥିଲେ। ୨୦୨୪ରେ ବିଜେଡି ଟିକଟରେ ସେ ଚମ୍ପୁଆରୁ ଜିତିଥିଲେ। ରାଜ୍ୟରେ ବିଜେଡି କ୍ଷମତାଚ୍ୟୁତ ହେବା ପରେ ଓ ବିଜେପି ସରକାର ଗଠନ ହେବା ଦିନଠୁ ସନାତନଙ୍କ କାର୍ଯ୍ୟକଳାପକୁ ନେଇ ରାଜନୈତିକ ମହଲରେ ଚର୍ଚ୍ଚା ହେଉଥିଲା। କାରଣ ସେ ବିଜେଡିର ବିଧାୟକ ଦଳ ବୈଠକକୁ ଆସୁନଥିଲେ। ଏପରିକି ଦଳୀୟ ମାର୍ଗଦର୍ଶିକାକୁ ସେ ମାନୁନଥିଲେ। ଗତବର୍ଷ ଫେବୃଆରୀ ମାସରେ ବିଧାନସଭା ଅଧିବେଶନ ସମୟରେ ସନାତନଙ୍କୁ ନିଜେ ନବୀନ ଏଥିପାଇଁ ତାଗିଦ କରିଥିଲେ। କାହିଁକି ବିଧାୟକ ଦଳ ବୈଠକକୁ ଆସିନଥିଲ ବୋଲି ନବୀନ ତାଙ୍କୁ ପଚାରିଥିଲେ। ଅସୁସ୍ଥ ଥିବାରୁ ବୈଠକକୁ ଆସିପାରିନଥିବା ସନାତନ କହିବା ପରେ ନବୀନ ରାଗିଯାଇଥିଲେ । ହେଲେ ଦଳ ସେ ସମୟରେ କାର୍ଯ୍ୟାନୁଷ୍ଠାନ ନେଇନଥିଲେ ବି ସନାତନଙ୍କ କାର୍ଯ୍ୟକଳାପରେ କୌଣସି ପରିବର୍ତ୍ତନ ଦେଖିବାକୁ ମିଳିନଥିଲା। ତାଙ୍କ ଆଚରଣ ଓ ଉଚ୍ଚାରଣ ଶାସକ ଦଳ ଓ ସରକାର ସପକ୍ଷେ୍ର ଥିଲା। ନୂଆବର୍ଷରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଫଟୋ ଥିବା ବିଜ୍ଞାପନ ଖବରକାଗଜରେ ପ୍ରକାଶ କରି ପୁଣି ସନାତନ ଚର୍ଚ୍ଚାକୁ ଆସିଥିଲେ। ଗୁରୁତ୍ବପୂର୍ଣ୍ଣ କଥା ହେଲା, ନିକଟରେ ସନାତନ ବିଜେଡିର ୨୪ ବର୍ଷ ଶାସନକୁ ତାଚ୍ଛଲ୍ୟ କରିଥିଲେ। ୨୪ ବର୍ଷ ସରକାରରେ ବିଜେଡି କେନ୍ଦୁଝରକୁ ଅବହେଳା କରିଛି ବୋଲି ସନାତନ କହିଥିଲେ। ସନାତନଙ୍କ ଏପରି ବୟାନକୁ ବିଜେଡି ସହଜରେ ହଜମ କରିପାରିନି। ଯେଉଁଥିପାଇଁ ତାଙ୍କୁ ଦଳରୁ ନିଲମ୍ବନ କରାଗଲା ବୋଲି ଆଲୋଚନା ହେଉଛି।