ହ୍ୟୁମାନ ସାଗର ମୃତ୍ୟୁ ରହସ୍ୟ

 ବିଶିଷ୍ଟ କଣ୍ଠଶିଳ୍ପୀ ହ୍ୟୁମାନ ସାଗରଙ୍କ ରହସ୍ୟଜନକ ମୃତ୍ୟୁ ଘଟଣାକୁ ନେଇ ସିଭିଲ ସୋସାଇଟି ଓଡ଼ିଶା ସୋମବାର ଗୃହ ବିଭାଗର ଦ୍ୱାରସ୍ଥ ହୋଇଛି। ନିରପେକ୍ଷ ଓ ଉଚ୍ଚସ୍ତରୀୟ ତଦନ୍ତ ସହ ମୃତ୍ୟୁର ପ୍ରକୃତ ରହସ୍ୟ ଉନ୍ମୋଚନ ପାଇଁ ଦାବି ଜଣାଇ ସଂଗଠନ ପକ୍ଷରୁ ଲୋକସେବା ଭବନଠାରେ ଗୃହ ବିଭାଗର ସ୍ୱତନ୍ତ୍ର ସଚିବଙ୍କୁ ଦାବିପତ୍ର ପ୍ରଦାନ କରାଯାଇଛି। ସିଭିଲ ସୋସାଇଟି ଓଡ଼ିଶାର ସମ୍ପାଦକ ବିଶ୍ୱନାଥ ପାତ୍ର ନେତୃତ୍ୱରେ ଏକ ପ୍ରତିନିଧି ଦଳ ସ୍ୱତନ୍ତ୍ର ସଚିବଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି। ଦାବିପତ୍ରରେ ଉଲ୍ଲେଖ କରାଯାଇଛି ଯେ, ପରିବାର ଲୋକେ ଅନୁପସ୍ଥିତ ଥାଇ କାହିଁକି ହ୍ୟୁମାନ ସାଗରଙ୍କୁ ମେଡିକାଲରେ ଭର୍ତ୍ତି କରାଗଲା? ଅଧରାତ୍ରିରେ କିଏ ଓ କାହିଁକି ତାଙ୍କୁ ମେଡିକାଲକୁ ନେଇଥିଲେ? ଏହି ମୃତ୍ୟୁ ପଛରେ ଗଭୀର ଷଡ଼ଯନ୍ତ୍ର ରହିଛି ବୋଲି ସିଭିଲ ସୋସାଇଟି ଅଭିଯୋଗ କରିଛି।ଏହି ଘଟଣାକୁ ନେଇ ବିଭିନ୍ନ ଥାନାରେ ଅଭିଯୋଗ ହୋଇସାରିଛି ଏବଂ ପୋଲିସ୍ ମଧ୍ୟ ମାମଲା ରୁଜୁ କରିଛି। କିନ୍ତୁ ତଦନ୍ତ ଯଥେଷ୍ଟ ଗତି ନେଇ ନ ଥିବାରୁ ସିଭିଲ ସୋସାଇଟି ଦାବି କରିଛି ଯେ, ବରିଷ୍ଠ ପୋଲିସ୍ ଅଧିକାରୀଙ୍କୁ ନେଇ ଏକ ବିଶେଷ ତଦନ୍ତ ଟିମ୍ ଗଠନ କରାଯାଉ ଏବଂ ଦୋଷୀମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ। ସିଭିଲ ସୋସାଇଟି ଓଡ଼ିଶାର ସମ୍ପାଦକ ବିଶ୍ୱନାଥ ପାତ୍ର କହିଛନ୍ତି, ‘‘ହ୍ୟୁମାନ ସାଗର ଓଡ଼ିଶାର ଗର୍ବ ଥିଲେ। ତାଙ୍କର ଏଭଳି ରହସ୍ୟଜନକ ମୃତ୍ୟୁ ସମଗ୍ର ରାଜ୍ୟକୁ ଆଘାତ ଦେଇଛି। ଏହାର ନିରପେକ୍ଷ ତଦନ୍ତ ନ ହେଲେ ନ୍ୟାୟ ମିଳିବ ନାହିଁ। ଆମେ ସରକାରଙ୍କୁ ଅନୁରୋଧ କରୁଛୁ ଯେ, ଯଥାଶୀଘ୍ର ଉଚ୍ଚସ୍ତରୀୟ ତଦନ୍ତ କରାଯାଉ ଏବଂ ପ୍ରକୃତ ସତ୍ୟ ସାମ୍ନାକୁ ଆସୁ ବୋଲି ସେମାନେ ଦାବି କରିଛନ୍ତି ।