ଡ୍ରୋନ୍ ମାଲିକାନା ନେଇ ଯାଞ୍ଚ ଆରମ୍ଭ
ମନ୍ଦିର ପରିସରରେ ପାଟ୍ରୋଲିଂ ଓ ସୁରକ୍ଷା ବଢ଼ିଲା
ଓଡ଼ିଶାର ପ୍ରାଚୀନ ଓ ପବିତ୍ର ଲିଙ୍ଗରାଜ ମନ୍ଦିର ଉପରେ ଏକ ସନ୍ଦିଗ୍ଧ ଡ୍ରୋନ୍ ଉଡ଼ୁଥିବା ଦେଖାଯାଇଛି । ଏହି ଘଟଣା ମନ୍ଦିର ପରିସର ଓ ଆଖପାଖ ଅଞ୍ଚଳରେ ନିରାପତ୍ତା ନେଇ ଗଭୀର ଚିନ୍ତା ସୃଷ୍ଟି କରିଛି। ପ୍ରାୟ ୧୫ ମିନିଟ୍ ଧରି ଏହି ଡ୍ରୋନ୍ ମନ୍ଦିର ଉପରେ ଉଡ଼ୁଥିବା ସ୍ଥାନୀୟ ଲୋକେ ଓ ମନ୍ଦିର କର୍ମଚାରୀମାନେ ଦେଖିଥିଲେ।
ସୋମବାର ଅପରାହ୍ନ ୫ଟା ୧୫ରୁ ୫ଟା ୩୦ ପର୍ଯ୍ୟନ୍ତ ଏହି ଡ୍ରୋନ୍ ଉଡ଼ିଥିଲା। ଡ୍ରୋନ ଉଡ଼ିବା ନେଇ ଡିଜିପିଙ୍କ ପୂର୍ବରୁ କଟକଣା ରହିଥିଲା। ଏହା ସତ୍ତ୍ବେ ମଧ୍ୟ ଡ୍ରୋନ୍ ଉଡ଼ୁଥିବାର ନଜରକୁ ଆସିଥିଲା । ଏହା ଦେଖିବା ପରେ ମନ୍ଦିର ସେବାୟତ ପୋଲିସକୁ ଅବଗତ କରିଥିଲେ। ତେବେ ଏହି ଡ୍ରୋନ କିଏ ଓ କାହିଁକି ଉଡ଼ାଇଛନ୍ତି ତାହାକୁ ନେଇ ଏବେ ବଡ଼ ପ୍ରଶ୍ନ ଉଠିଛି ।
ସୂଚନା ଅନୁଯାୟୀ, ମନ୍ଦିର ପରିସରରେ ଥିବା କେତେକ ସେବାୟତ ଓ ଆଖପାଖରେ ରହୁଥିବା ଲୋକେ ଏକ ଆଲୋକିତ ବସ୍ତୁ ମନ୍ଦିର ଉପରେ ଉଡ଼ୁଥିବା ଦେଖିଥିଲେ । ପରେ ଏହା ଏକ ଡ୍ରୋନ୍ ବୋଲି ସ୍ପଷ୍ଟ ହୋଇଥିଲା। ଡ୍ରୋନ୍ଟି ମନ୍ଦିରର ଗର୍ଭଗୃହ ଓ ଅନ୍ୟାନ୍ୟ ଅଂଶ ଉପରେ ବାରମ୍ବାର ଚକର ଦେଉଥିବା ଦେଖାଯାଇଥିଲା।
ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ମନ୍ଦିର ପରିସର ଓ ଆଖପାଖ ଅଞ୍ଚଳରେ ଥିବା ସିସିଟିଭି ଫୁଟେଜ ଯାଞ୍ଚ କରାଯାଉଛି । ତେବେ ଡ୍ରୋନ୍ଟି କିଏ ଓ କାହିଁକି ଉଡ଼ାଇଥିଲା, ତାହା ରିପୋର୍ଟ ଲେଖା ହେବା ସୁଦ୍ଧା ସ୍ପଷ୍ଟ ହୋଇନାହିଁ । ଏହା କୌଣସି ଅନୁମତି ବିନା ଉଡ଼ାଯାଇଥାଇପାରେ, ଯାହା ନିରାପତ୍ତା ନିୟମର ଉଲ୍ଲଂଘନ ବୋଲି ପୋଲିସ ଅନୁମାନ କରୁଛି ।
ଲିଙ୍ଗରାଜ ମନ୍ଦିର ଭୁବନେଶ୍ୱରର ଏକ ପ୍ରମୁଖ ଧାର୍ମିକ ଓ ଐତିହାସିକ ସ୍ଥାନ ହୋଇଥିବାରୁ ଏହାର ନିରାପତ୍ତା ନେଇ ସର୍ବଦା ସତର୍କତା ଅବଲମ୍ବନ କରାଯାଇଥାଏ । ଏପରି ଏକ ସମ୍ବେଦନଶୀଳ ଅଞ୍ଚଳରେ ଅଜଣା ଡ୍ରୋନ୍ର ଉପସ୍ଥିତି ମନ୍ଦିର ପ୍ରଶାସନ ଓ ସ୍ଥାନୀୟ ବାସିନ୍ଦାଙ୍କ ମଧ୍ୟରେ ଆତଙ୍କ ସୃଷ୍ଟି କରିଛି ।
