ଅକ୍ଟୋବର ୧୬ରେ ନିଜର ୭୯ ତମ ଜନ୍ମଦିନରେ ବିରୋଧୀ ଦଳ ନେତା ତଥା ବିଜେଡି ସଭାପତି ନବୀନ ପଟ୍ଟନାୟକ ଭୁବନେଶ୍ୱରର ଗଙ୍ଗନଗର ୱାର୍ଡ ନଂ. ୫୨ରେ ଜନସଂପର୍କ ପଦଯାତ୍ରାରେ ଅଂଶଗ୍ରହଣ କରିବେ। ଏହି ଅବସରରେ ଦଳର କର୍ମୀମାନେ ନବୀନଙ୍କୁ ଜନ୍ମଦିନର ଶୁଭେଚ୍ଛା ଜଣାଇବେ ଏବଂ ସେ ଏସଓଏସ୍ ଭିଲେଜ୍ରେ ଯାଇ ମିଷ୍ଟାନ୍ନ ବଣ୍ଟନ କରିବେ। ଏହା ବିଜେଡିର ବାର୍ଷିକ ଜନସଂପର୍କ ପଦଯାତ୍ରାର ଏକ ଅଂଶ ଭାବେ ହେବ ବୋଲି ବିଜେଡିର ଭୁବନେଶ୍ୱର ଜିଲ୍ଲା ସଭାପତି ଅଶୋକ ପଣ୍ଡା ଏହି ସୂଚନା ଦେଇଛନ୍ତି।
ଶ୍ରୀ ପଣ୍ଡା କହିଛନ୍ତି ଯେ, ପଦଯାତ୍ରା ବିଜୁ ଆଦର୍ଶ କଲୋନୀରୁ ଆରମ୍ଭ ହେବ ଏବଂ ସ୍ଥାନୀୟ ବାସିନ୍ଦାମାନଙ୍କ ସହ ସଂପର୍କ ବଢ଼ାଇବା ସହ ବର୍ତ୍ତମାନର ବିଜେପି ସରକାରର ବିଫଳତା ଯଥା ମହିଳାଙ୍କ ଉପରେ ଅତ୍ୟାଚାର, ଆଇନ ଶୃଙ୍ଖଳା ଅବନତି, କୃଷକଙ୍କ ଅବହେଳା ଓ ମୂଲ୍ୟବୃଦ୍ଧି ଆଦି ବିଷୟରେ ଆଲୋଚନା କରାଯିବ। ଏହି ପଦଯାତ୍ରା ମାସେ ବ୍ୟାପୀ ଚାଲିବ, ଯାହା ଉତ୍କଳମଣି ଗୋପବନ୍ଧୁ ଦାସଙ୍କ ଜନ୍ମଦିନରେ ଆରମ୍ଭ ହୋଇଥିଲା । ଅଶୋକ ପଣ୍ଡା କହିଛନ୍ତି ଯେ, ଅକ୍ଟୋବର ୧୬ ନବୀନଙ୍କର ଜନ୍ମଦିନ ହୋଇଥିବାରୁ, ଦଳର କର୍ମୀ ଏବଂ ସାଧାରଣ ଜନତା ଗଙ୍ଗନଗରର ବିଜୁ ଆଦର୍ଶ କଲୋନୀରେ ପଦଯାତ୍ରା ସମୟରେ ତାଙ୍କୁ ଜନ୍ମଦିନର ଶୁଭେଚ୍ଛା ଜଣାଇବେ। ଏହାପରେ ସେ ଏସଓଏସ୍ ଚିଲଡ୍ରେନ୍ସ ଭିଲେଜ୍କୁ ଯାଇ ବାସିନ୍ଦାମାନଙ୍କୁ ମିଷ୍ଟାନ୍ନ ବଣ୍ଟନ କରିବେ। ଆମ ନେତା ସର୍ବଦା କହିଛନ୍ତି ଯେ ବିଜେଡି ଓଡ଼ିଶାର ଜନତାଙ୍କର ଅଟେ। ଏହି କାର୍ଯ୍ୟକ୍ରମ ପାଇଁ ଭୁବନେଶ୍ୱର ଜିଲ୍ଲା ବିଜେଡି ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି।