ନୂଆପଡ଼ା ଉପନିର୍ବାଚନରେ କଂଗ୍ରେସର ଶୋଚନୀୟ ପରାଜୟ ପରେ ପିସିସି ସଭାପତି ଭକ୍ତ ଚରଣ ଦାସଙ୍କ ବିଭୀଷଣ ମନ୍ତବ୍ୟକୁ ନେଇ ଦଳ ଭିତରେ ଅସନ୍ତୋଷ ଦେଖାଦେଇଛି । ଦଳର ମୁଖପାତ୍ର ସଂଗ୍ରାମ ମାଝୀ କହିଛନ୍ତି ଯେ, ‘ଯଦି ଆମେ ବିଭୀଷଣ ତେବେ ରାବଣ କିଏ? ରାବଣ କିଏ ସେ ଉତ୍ତର ଦିଅନ୍ତୁ । ଦୀର୍ଘ ସମୟ ଧରି ଦଳ ପାଇଁ ଲଢ଼ି ଆସିଥିବା ଯୁବ ନେତାମାନଙ୍କୁ ବିଭୀଷଣ କହିବା ଶୋଭା ପାଉନାହିଁ। ନିଲମ୍ବନର ଭୟ ନାହିଁ, ୭୦ରୁ ୮୦ ଭାଗ ନେତା ଏହି ମନ୍ତବ୍ୟକୁ ବିରୋଧ କରୁଛନ୍ତି। ରାହୁଲ ଗାନ୍ଧୀ ସବୁ ଧର୍ମ ଓ ଜାତି ପାଇଁ ଲଢୁଛନ୍ତି ଆଉ ଏମାନେ ଧର୍ମ ଓ ଜାତିକୁ ନେଇ କଥା କହୁଛନ୍ତି। ଦଳରେ ଏକଛତ୍ରବାଦ ଚାଲିଛି, ବ୍ୟକ୍ତିଗତ ସ୍ୱାର୍ଥ ପାଇଁ ଦଳିଆ ସ୍ୱାର୍ଥକୁ ଜଳାଞ୍ଜଳୀ ଦେଇଛନ୍ତି। ଖୁବ ଶୀଘ୍ର ଦିଲ୍ଲୀ ଯାଇ ହାଇକମାଣ୍ଡକୁ ଜଣାଇବୁ। ସେହିଭଳି ପୂର୍ବତନ ପିସିସି ମୁଖପାତ୍ର ଶୁଭେନ୍ଦୁ ମଲିକ କହିଛନ୍ତି ଯେ, ‘ଏଭଳି ମନ୍ତବ୍ୟ ପିସିସି ସଭାପତିଙ୍କୁ ଶୋଭା ଦେଉନାହିଁ। ଆମେ ରାହୁଲ ଗାନ୍ଧୀଙ୍କ ଆଦର୍ଶରେ ଅନୁପ୍ରାଣିତ। ଖୁବ ଶୀଘ୍ର ଦିଲ୍ଲୀ ଯାଇ ହାଇକମାଣ୍ଡକୁ ଜଣାଇବୁ।
ଯୁବ ନେତାଙ୍କ ଏଭଳି ମନ୍ତବ୍ୟକୁ ଖଣ୍ଡନ କରି ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ କହିଛନ୍ତି ଯେ, ସମସ୍ତେ ଏକଜୁଟ ହୋଇ ଦଳକୁ ମଜବୁତ କରିବା ଆବଶ୍ୟକ। ଦଳରେ କୌଣସି ଝଡ଼ ନାହିଁ। ଖୁବ ଶୀଘ୍ର ସବୁ ଠିକ୍ ହୋଇଯିବ। ବିଧାୟକ ଅଶୋକ ଦାସ କହିଛନ୍ତି ଯେ, କଂଗ୍ରେସରେ କୌଣସି ଝଡ଼ ନାହିଁ। ଝଡ଼ ଭିତରେ କଂଗ୍ରେସ ବଞ୍ଚିଛି ଓ ବଞ୍ଚିବ। ସବୁ ପରିବାରରେ କିଛି ମତାନ୍ତର ରହିଛି, ଆମର ମଧ୍ୟ ରହିଛି। ଖୁବ ଶୀଘ୍ର ସବୁ ଠିକ ହୋଇଯିବ। ପୂର୍ବତନ ପିସିସି ସଭାପତି ଜୟଦେବ ଜେନା କହିଛନ୍ତି ଯେ, ଯଦି ମିଳିତ ଭାବରେ ଏକଜୁଟ ନ ହୋଇ ମନରେ କିଛି ଆବିଳତା ରହିବ ତେବେ କଂଗ୍ରେସ କ୍ଷମତାକୁ ଆସିବ ନାହିଁ। ବାକି ବିଭୀଷଣ କିଏ, ରାବଣ କିଏ ଖୋଜିବାର ଦରକାର ନାହିଁ। ଭକ୍ତଙ୍କ ନେତୃତ୍ୱରେ ଏକଜୁଟ ହେବାର ଆବଶ୍ୟକତା ଅଛି ବୋଲି ସେ କହିଛନ୍ତି ।
