ଜନଗଣନାର ପ୍ରସ୍ତୁତି ଆରମ୍ଭ ହେବା ସହ ଓଡ଼ିଶା ସରକାର ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ ମାଧ୍ୟମରେ ଏକ ଗୁରୁତ୍ୱପୂର୍ଣ୍ଣ ନିଯୁକ୍ତି କରିଛନ୍ତି। ରାଜ୍ୟର ସମସ୍ତ ଜିଲ୍ଲାପାଳ ଏବଂ ମହାନଗର ନିଗମର କମିସନରମାନଙ୍କୁ ସମ୍ପୃକ୍ତ ଜିଲ୍ଲା ଓ ମହାନଗର ନିଗମର ପ୍ରମୁଖ ଜନଗଣନା ଅଧିକାରୀ ଭାବରେ ନିଯୁକ୍ତ କରାଯାଇଛି। ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଦେଓରାଞ୍ଜନ କୁମାର ସିଂହଙ୍କ ଦସ୍ତଖତରେ ଏହି ସମ୍ପର୍କିତ ଏକ ବିଜ୍ଞପ୍ତି ପ୍ରକାଶ ପାଇଛି । ସୋମବାର ବିଭାଗ ପକ୍ଷରୁ ପ୍ରକାଶିତ ବିଜ୍ଞପ୍ତିରେ ଦର୍ଶାଯାଇଛି ଯେ, ଓଡ଼ିଶା ସରକାରର ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ ଜାତୀୟ ଜନଗଣନା ନିୟମାବଳୀ, ୧୯୯୦ର ନିୟମ ୩ ଅଧୀନରେ ନିଜ ଅଧିକାର ପ୍ରୟୋଗ କରିଛନ୍ତି । ଏହି ଅନୁସାରେ, ଆଗାମୀ ୨୦୨୭ ଜନଗଣନା ପାଇଁ ରାଜ୍ୟର ପ୍ରତ୍ୟେକ ଜିଲ୍ଲାର ଜିଲ୍ଲାପାଳ ଏବଂ ସମସ୍ତ ମହାନଗର ନିଗମର କମିସନରମାନଙ୍କୁ ସମ୍ପୃକ୍ତ ଅଞ୍ଚଳର ପ୍ରିନ୍ସିପାଲ୍ ସେନ୍ସସ୍ ଅଫିସର (ପ୍ରମୁଖ ଜନଗଣନା ଅଧିକାରୀ) ଭାବରେ ନିଯୁକ୍ତ କରାଯାଇଛି। ଏହା ଦ୍ୱାରା ଜନଗଣନାର ସମଗ୍ର ପ୍ରକ୍ରିୟାରେ ସ୍ଥାନୀୟ ପ୍ରଶାସନର ନେତୃତ୍ୱରେ କାର୍ଯ୍ୟନ୍ବୟନ ହେବ । ଏଠାରେ ଉଲ୍ଲେଖଯୋଗ୍ୟ ଯେ, ଦେଶବ୍ୟାପୀ ହେବାକୁ ଥିବା ଜନଗଣନାରେ ୩୪ ଲକ୍ଷ ଗଣନାକାରୀ ଓ ସୁପରଭାଇଜରଙ୍କ ସମେତ ୧.୩ ଲକ୍ଷ ଜନଗଣନା କାର୍ଯ୍ୟକର୍ତ୍ତା ସାମିଲ ହେବେ। ଏହା ଭାରତର ୧୬ତମ ଓ ସ୍ୱାଧୀନତା ପରେ ୮ମ ଜନଗଣନା ହେବ। ୨୦୧୧ରେ କଂଗ୍ରେସ ନେତୃତ୍ୱାଧୀନ ୟୁପିଏ କ୍ଷମତାରେ ଥିବା ବେଳେ ଜନଗଣନା ହୋଇଥିଲା। ସେତେବେଳେ ମଧ୍ୟ ଦୁଇଟି ପର୍ଯ୍ୟାୟରେ ଦେଶରେ ଜନଗଣନା କରାଯାଇଥିଲା। ପ୍ରଥମେ ୨୦୧୦ ଏପ୍ରିଲରୁ ସେପ୍ଟେମ୍ବର ଯାଏ ଗଣନା ଚାଲିଥିଲା। ଏହାପରେ ୨୦୧୧ ଫେବୃଆରୀରୁ ବଳକା ଥିବା ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳରେ ଜନଗଣନା କରାଯାଇଥିଲା। ସେତେବେଳେ ଦେଶର ଜନସଂଖ୍ୟା ୧,୨୧୦,୮୫୪,୯୭୭ ବା ୧.୨୧ ବିଲିୟନରୁ ଅଧିକ ରହିଥିଲା।
ଜିଲ୍ଲାପାଳ ଓ ମହାନଗର ନିଗମର କମିସନର ପ୍ରମୁଖ ଜନଗଣନା ଅଧିକାରୀ ନିଯୁକ୍ତ
