ଯେଉଁ ଅଧିକାରୀମାନେ ସମ୍ପତ୍ତି ତାଲିକା ଦେଇନାହାନ୍ତି, ସେମାନଙ୍କୁ ବିଭାଗୀୟ ପଦୋନ୍ନତି କମିଟି (ଡିପିସି)ରେ ଅଯୋଗ୍ୟ(ନଟ ସୁଇଟେବୁଲ) ବିବେଚନା କରାଯିବ ବୋଲି ସାଧାରଣ ପ୍ରଶାସନ ବିଭାଗ ସ୍ପଷ୍ଟ ନିର୍ଦ୍ଦେଶ ଦେଇଛି। ବର୍ଷ ସରିବାକୁ ହେଲାଣି, ହେଲେ ଅଧିକାଂଶ ଅଧିକାରୀ ସେମାନଙ୍କ ସମ୍ପତ୍ତି ତାଲିକା ଦେଇ ନ ଥିବାରୁ ସେମାନଙ୍କ ପଦୋନ୍ନତିରେ ବାଧା ଉପୁଜିବା ନେଇ ବିଭାଗ କହିଛି । ଏସଂକ୍ରାନ୍ତରେ ସାଧାରଣ ପ୍ରଶାସନ ବିଭାଗ ପକ୍ଷରୁ ଅତିରିକ୍ତ ମୁଖ୍ୟ ଶାସନ ସଚିବ ସୁରେନ୍ଦ୍ର କୁମାର ନଭେମ୍ବର ୨୭ରେ ଏକ ନିଦେର୍ଶନାମା ଜାରି କରିଛନ୍ତି। ସେ ଦର୍ଶାଇଛନ୍ତି ଯେ, ଓଡ଼ିଶା ସିଭିଲ ସର୍ଭିସ ନିୟମ-୧୯୯୨ ଅନୁଯାୟୀ, ଅଧିକାରୀମାନେ ଯଦି ସରକାରଙ୍କ ସବୁ ମାନଦଣ୍ଡରେ ପାରଦର୍ଶିତା ହାସଲ କରିବେ ଏବଂ ବରିଷ୍ଠ ହୋଇଥିବେ ତେବେ ତାଙ୍କୁ ନିଶ୍ଚିତ ପଦୋନ୍ନତି ଦିଆଯିବାର ବ୍ୟବସ୍ଥା ରହିଛି। ମାତ୍ର ସରକାରଙ୍କ ପକ୍ଷରୁ ବାରମ୍ବାର ତାଗିଦ ସତ୍ବେ ବହୁ ଅଧିକାରୀ ଏପର୍ଯ୍ୟନ୍ତ ତାଙ୍କର ସମ୍ପତ୍ତି ବିବରଣୀ ସରକାରଙ୍କୁ ପ୍ରଦାନ କରି ନ ଥିବା ବିଭାଗୀୟ ପଦୋନ୍ନତି କମିଟି(ଡିପିସି)ରୁ ଜଣାଯାଇଛି। ଏହାକୁ ନେଇ ସରକାର କଠୋର ନିଷ୍ପତ୍ତି ନେଇଛନ୍ତି। ଯେଉଁ ଅଧିକାରୀମାନେ ସମ୍ପତ୍ତି ତାଲିକା ନ ଦେବେ ସେମାନଙ୍କ ପଦୋନ୍ନତି କଥା ବିଚାର କରାଯିବ ନାହିଁ। ଯେଉଁ ଅଧିକାରୀମାନେ ସମ୍ପତ୍ତି ତାଲିକା ସରକାରଙ୍କୁ ଦେଇଥିବେ ସେମାନଙ୍କ କଥା ପଦୋନ୍ନତି କମିଟି ବିଚାରକୁ ନେବ ଏବଂ ଯେଉଁମାନେ ଦେବେ ନାହିଁ, ସେମାନଙ୍କ ପଦୋନ୍ନତି ହେବନାହିଁ । ଯଦି ଅଧିକାରୀ ଜଣକ ଡିପିସି ପରେ ତାଙ୍କର ସମ୍ପତ୍ତି ତାଲିକା ପ୍ରଦାନ କରନ୍ତି ତେବେ ସେ ବରିଷ୍ଠତା ପଦୋନ୍ନତି ନେଇ ଦାବି କରିପାରିବେ ନାହିଁ ବୋଲି ସୁରେନ୍ଦ୍ର କୁମାର ଦର୍ଶାଇଛନ୍ତି। ସୂଚନାଯୋଗ୍ୟ ଯେ, ସୁରେନ୍ଦ୍ର କୁମାର ଏ ସଂକ୍ରାନ୍ତରେ ପୂର୍ବରୁ ବିଭାଗୀୟ ମୁଖ୍ୟଙ୍କୁ ପତ୍ର ଲେଖି ଅବଗତ କରାଇଛନ୍ତି। ଗତ ମାସ ସାଧାରଣ ପ୍ରଶାସନ ବିଭାଗର ଚିଠି ଅନୁସାରେ ଜାନୁଆରୀ ସୁଦ୍ଧା ସମ୍ପତ୍ତି ବିବରଣୀ ଦେବାକୁ କୁହାଯାଇଥିଲା। ୨୦୨୪ ବର୍ଷ ପାଇଁ ସମ୍ପତ୍ତି ତାଲିକା ଦେଇ ନ ଥିଲେ ପଦୋନ୍ନତି ବନ୍ଦ ବୋଲି ସାଧାରଣ ପ୍ରଶାସନ ବିଭାଗ ପକ୍ଷରୁ ନିର୍ଦ୍ଦେଶନାମା ଜାରି କରାଯାଇଥିଲା । ସମ୍ପତ୍ତି ତାଲିକା ଦଖଲ ପାଇଁ ପର୍ଯ୍ୟାପ୍ତ ସମୟ ଦିଆଯାଇ ସାରିଛି, ଏଚଆରଏମ ପୋର୍ଟାଲ ଆଉ ଖୋଲିବ ନାହିଁ ବୋଲି ବିଭାଗ ପକ୍ଷରୁ ସ୍ପଷ୍ଟ କରାଯାଇଥିଲା । ୨୦୨୫ର ସମ୍ପତ୍ତି ତାଲିକା ୨୦୨୬ ଜାନୁଆରୀ ୧ରୁ ୩୧ ଭିତରେ ଦାଖଲ ନିର୍ଦ୍ଦେଶ ମଧ୍ୟ ଦିଆଯାଇଥିଲା ।
ପଦୋନ୍ନତି ଯୋଗ୍ୟ ବହୁ ଅଧିକାରୀ ସମ୍ପତ୍ତି ତାଲିକା ଦେଇନାହାନ୍ତି,ସରକାରୀ ବାବୁ
