ସରକାରୀ ଅଫିସ, ଅଫିସର ଏବଂ ଭିଭିଆଇପିଙ୍କ ଦ୍ୱାରା ବ୍ୟବହୃତ ଘରୋଇ ଗାଡ଼ିଗୁଡ଼ିକର ଭଡ଼ାକୁ ରାଜ୍ୟ ସରକାର ସୋମବାର ସଂଶୋଧନ କରିଛନ୍ତି। ଏଥିରେ ବିଭିନ୍ନ ଶ୍ରେଣୀର ଗାଡ଼ି ପାଇଁ ମାସିକ ଭଡ଼ା ଦର ଓ ସର୍ବନିମ୍ନ ମାଇଲେଜ୍ ନିର୍ଦ୍ଧାରଣ କରାଯାଇଛି । ପ୍ରାୟ ୬ ବର୍ଷ ପରେ ଏହି ଭଡ଼ା ଦରରେ ସଂଶୋଧନ କରାଯାଇଥିବା ଅର୍ଥ ବିଭାଗ ପକ୍ଷରୁ ସୂଚନା ମିଳିଛି ।
ବ୍ଲକ, ତହସିଲ ଓ ଅନ୍ୟାନ୍ୟ କ୍ଷେତ୍ରୀୟ କାର୍ଯ୍ୟାଳୟ ପାଇଁ ଉପଯୋଗ ହେଉଥିବା ଗାଡ଼ିଗୁଡ଼ିକର ମାସିକ ଭଡ଼ା ଦର ୩୭୨୦୦ଟଙ୍କା ଓ ସର୍ବନିମ୍ନ ମାଇଲେଜ୍ ୧୦କିମି ପ୍ରତି ଲିଟରକୁ ବୃଦ୍ଧି କରାଯାଇଛି । ଯାହାକି ପୂର୍ବରୁ ୩୧ହଜାର ଟଙ୍କା ଥିଲା । ସେହିପରି ଜିଲ୍ଲା ଓ ରେଞ୍ଜ ସ୍ତରୀୟ କାର୍ଯ୍ୟାଳୟ ପାଇଁ ଘରୋଇ ଗାଡ଼ିଗୁଡ଼ିକର ଭଡ଼ା ୨୪ହଜାର (ପୂର୍ବରୁ ୨୦ହଜାର ଟଙ୍କା) ଓ ମାଇଲେଜ୍ ୧୭ କିଲୋମିଟର ପ୍ରତି ଲିଟର ଧାର୍ଯ୍ୟ ହୋଇଛି । । ଜିଲ୍ଲାପାଳ, ପୁଲିସ ଏସପି ଓ ସମକକ୍ଷ ଅଧିକାରୀ ଉପଯୋଗ କରୁଥିବା ଘରୋଇ ଗାଡ଼ିର ଭଡ଼ା ମାସିକ ୪୪୪୦୦ ଟଙ୍କା (ପୂର୍ବରୁ ୩୭ହଜାର ଟଙ୍କା ଥିଲା) ଓ ମାଇଲେଜ୍ ୧୦ କିଲୋମିଟର ଧାର୍ଯ୍ୟ କରାଯାଇଛି ।
ବିଭାଗୀୟ ମୁଖ୍ୟ ଓ ପ୍ରଶାସନିକ ବିଭାଗର ପୁଲ ଗାଡ଼ି ପାଇଁ ଭଡ଼ା ୨୪ହଜାର ଟଙ୍କା ଓ ପ୍ରତି ଲିଟରରେ ମାଇଲେଜ୍ ୧୭ କିଲୋମିଟର ଧାର୍ଯ୍ୟ ହୋଇଛି ।ସ୍ୱତନ୍ତ୍ର ସଚିବ, ଅତିରିକ୍ତ ସଚିବ ଓ ନିର୍ଦ୍ଦେଶକ ଉପଯୋଗ କରୁଥିବା ଗାଡ଼ିର ଭଡ଼ା ୩୧୨୦୦ ଟଙ୍କା ଓ ଲିଟରପିଛା ମାଇଲେଜ୍ ୧୭ କିଲୋମିଟର ରହିଛି। ପ୍ରମୁଖ ସଚିବ ଓ କମିଶନର-ତଥା-ସଚିବ ପାହ୍ୟାର ଅଫିସରଙ୍କ ପାଇଁ ଗାଡ଼ି ଭଡ଼ା ୩୬ହଜାର ଟଙ୍କା ଓ ଲିଟରପିଛା ମାଇଲେଜ୍ ୧୨ କିଲୋମିଟର ରଖାଯାଇଛି । ସେହିପରି ଆପେକ୍ସ ସ୍କେଲ ଅଫିସର ଓ ମନ୍ତ୍ରୀମାନଙ୍କ ଉପଯୋଗରେ ଘରୋଇ ଗାଡ଼ିର ଭଡ଼ାକୁ ୫୦୪୦୦ଟଙ୍କା ଓ ମାଇଲେଜ୍ ୯ କିଲୋମିଟର ପ୍ରତି ଲିଟର ଧାର୍ଯ୍ୟ କରାଯାଇଛି ।
କଲେଜ, ବିଶ୍ୱବିଦ୍ୟାଳୟ ଓ ତାଲିମ ଅନୁଷ୍ଠାନ ପାଇଁ ୩୨-ସିଟର ଘରୋଇ ବସର ଭଡ଼ା ୯୦ହଜାର ଟଙ୍କା ଏବଂ ୨୫-ସିଟର ବସର ଭଡ଼ା ୭୧୫୦୦ ଟଙ୍କା ଏବଂ ଲିଟର ପିଛା ୬ କିଲୋମିଟର ଧାର୍ଯ୍ୟ ହୋଇଛି । ଏସବୁ ବ୍ୟତୀତ ସ୍ୱତନ୍ତ୍ର ଉଦ୍ଦେଶ୍ୟ ପାଇଁ ଉପଯୋଗ ହେଉଥିବା ଘରୋଇ ଗାଡ଼ି ମଧ୍ୟରେ ଟାଟା ଏସି ଓ ସମାନ ଧରଣର ଘରୋଇ ଗାଡ଼ିର ଭଡ଼ା ୩୩,୫୦୦ ଟଙ୍କା ଓ ସର୍ବନିମ୍ନ ମାଇଲେଜ୍ ଲିଟରପିଛା ୧୬ଟଙ୍କା ଧାର୍ଯ୍ୟ ହୋଇଛି । ମହିନ୍ଦ୍ରା ପିକଅପ୍ ଭ୍ୟାନ, ବୋଲେରୋ କ୍ୟାଂପର, ଟାଟା ୪୦୭ ଓ ଟାଟା ଯୋଦ୍ଧା ପିକଅପ୍ ପାଇଁ ଭଡ଼ା ୪୨ହଜାର ଟଙ୍କା ଏବଂ ମାଇଲେଜ୍ ୬ କିଲୋମିଟର ପ୍ରତି ଲିଟର ଧାର୍ଯ୍ୟ ହୋଇଛି ।
ବ୍ୟବହାର ସୀମା ଓ ନିୟମ
ବିଭାଗୀୟ ମୁଖ୍ୟ ଓ ତଦୁର୍ଦ୍ଧ ପ୍ୟାହାର ଉଚ୍ଚ ଅଧିକାରୀଙ୍କ ଗାଡ଼ି ମାସିକ ୨୫୦୦ କିଲୋମିଟର ଏବଂ ଅନ୍ୟ ଅଧିକାରୀ ଓ ପୁଲ ଡ୍ୟୁଟି ଗାଡ଼ି ୨ହଜାର କିଲୋମିଟର ପର୍ଯ୍ୟନ୍ତ ବ୍ୟବହାର କରାଯାଇପାରିବ । ୨୦%ରୁ ଅଧିକ ବ୍ୟତିକ୍ରମ ହେଲେ ପ୍ରଶାସନିକ ବିଭାଗ ଏନେଇ ଆବଶ୍ୟକ କାରଣ ଉଲ୍ଲେଖ କରି ଅର୍ଥ ଅନୁମୋଦନ କରିବ । ତେବେ ଏସବୁ ଭଡ଼ା ଦରରେ ଇନ୍ଧନ(ତେଲ,ସିଏନଜି) ଆଦି ସାମିଲ ନୁହେଁ ଓ ନିୟମ ଅନୁସାରେ ଏହି ଇନ୍ଧନ ଖର୍ଚ୍ଚକୁ ଅତିରିକ୍ତ ପ୍ରଦାନ କରାଯିବ । ଗାଡ଼ି ଭଲ ଅବସ୍ଥାରେ ଥିବା ଦରକାର ଏବଂ ବୋଲି ଦାଖଲ ସମୟରେ ୩ ବର୍ଷରୁ ଅଧିକ ପୁରୁଣା ହୋଇନଥିବା ଉଚିତ । ୭ ବର୍ଷରୁ ଅଧିକ ପୁରୁଣା ଗାଡ଼ି ଉପଯୋଗ ହୋଇପାରିବ ନାହିଁ ଓ ଏହି ଟ୍ରାଲେଭଲସ୍ ସେବା ପ୍ରଦାନକାରୀଙ୍କର ବୈଧ ଜିଏସଟି ପଞ୍ଜୀକରଣ ଥିବା ଦରକାର ତଥା ନଗର ନିଗମ ଅଂଚଳରେ ଏହା ଜିଇଏମ୍ ପୋର୍ଟାଲରେ ପଞ୍ଜିକୃତ ହେବା ମଧ୍ୟ ଜରୁରୀ ବୋଲି ଅର୍ଥ ବିଭାଗ ପକ୍ଷରୁ ଜାରି ନିର୍ଦ୍ଦେଶନାମାରେ ଉଲ୍ଲେଖ ରହିଛି ।
By
