ରାଜ୍ୟର ଗ୍ରାମାଞ୍ଚଳରେ ଭୂମିହୀନ ପରିବାରଙ୍କ ପାଇଁ ପକ୍କା ଘର ଯୋଗାଇବାରେ କୌଣସି ବିଳମ୍ବକୁ ବରଦାସ୍ତ କରାଯିବ ନାହିଁ ବୋଲି ପଞ୍ଚାୟତୀରାଜ ଓ ପାନୀୟ ଜଳ ବିଭାଗ ସ୍ପଷ୍ଟ ନିର୍ଦ୍ଦେଶ ଦିଆଯାଇଛି । ତେଣୁ ଯୋଗ୍ୟ ଭୂମିହୀନ ହିତାଧିକାରୀଙ୍କୁ ପ୍ରାଥମିକତା ଭିତ୍ତିରେ ତୁରନ୍ତ ଜମି ପ୍ରଦାନ କରିବାକୁ ସମସ୍ତ ଜିଲ୍ଲାପାଳଙ୍କୁ କଡ଼ା ନିର୍ଦ୍ଦେଶନାମା ଜାରି କରାଯାଇଛି। ପଞ୍ଚାୟତୀରାଜ ଓ ପାନୀୟ ଜଳ ବିଭାଗର କମିସନର ଗିରିଶ୍ ଏସ୍. ଏନ୍., ଆଇ.ଏ.ଏସ୍.ଙ୍କ ଦସ୍ତଖତରେ ଜାରି ହୋଇଥିବା ଏକ ଚିଠିରେ ଗ୍ରାମାଞ୍ଚଳରେ ଭୂମିହୀନ ହିତାଧିକାରୀଙ୍କୁ ପ୍ରାଥମିକତା ଭିତ୍ତିରେ ଜମି ପ୍ରଦାନ କରିବାକୁ ସ୍ପଷ୍ଟ ନିର୍ଦ୍ଦେଶ ଦିଆଯାଇଛି। ଚିଠିରେ ଉଲ୍ଲେଖ କରାଯାଇଛି ଯେ, ପ୍ରତି ମାସର ପ୍ରଥମ ଶନିବାର ବ୍ଲକ୍ ଉନ୍ନୟନ ଅଧିକାରୀ (ବିଡ଼ିଓ) ଓ ତହସିଲଦାରଙ୍କ ସହିତ ମିଳିତ ବୈଠକ କରି ଭୂମିହୀନଙ୍କ ସମସ୍ୟାର ସମାଧାନ କରିବେ। ତେବେ ଏପର୍ଯ୍ୟନ୍ତ ଜିଲ୍ଲାମାନଙ୍କର ରିପୋର୍ଟ ଅନୁଯାୟୀ, ପିଏମ୍ଏୱାଇ-ଜିରେ ୮୭୧ ଏବଂ ପିଏମ୍-ଜନମନ୍ରେ ୫୦ ଜଣ ହିତାଧିକାରୀଙ୍କୁ ଏପର୍ଯ୍ୟନ୍ତ ଜମି ମିଳିନାହି । ଜିଲ୍ଲାୱାରୀ ତଥ୍ୟ ଅନୁସାରେ, ପିଏମ୍ଏୱାଇ-ଜି ରେ ସର୍ବାଧିକ କେନ୍ଦ୍ରାପଡ଼ା ଜିଲ୍ଲାରେ ୨୭୧ ଜଣ ଭୂମିହୀନଙ୍କୁ ଜମି ମିଳିନାହିଁ ଓ ଗଞ୍ଜାମରେ ୧୭୧ ଜଣ ଜମି ପାଇନାହାନ୍ତି । ଚିଠିରେ କୁହାଯାଇଛି ଯେ, ଆବାସ+ ୨୦୨୪ ସର୍ଭେ ଅନୁଯାୟୀ ରାଜ୍ୟରେ ମୋଟ ୩୭.୮୯ ଲକ୍ଷ ପରିବାର ସର୍ଭେ କରାଯାଇଥିବା ବେଳେ ସେଥିମଧ୍ୟରୁ ୨ ଲକ୍ଷ ୧ ହଜାର ୧୧ ପରିବାର ଭୂମିହୀନ ବୋଲି ଚିହ୍ନଟ ହୋଇଛନ୍ତି। ଏହି ଯୋଗ୍ୟ ଭୂମିହୀନ ପରିବାରଙ୍କୁ ପ୍ରଥମିକତା ଭିତିତରେ ଆବାସ ଗୃହ କେନ୍ଦ୍ର ଗ୍ରମୀଣ ବିକାଶ ମନ୍ତ୍ରାଳୟର ଅନୁମୋଦନ ପରେ ବଣ୍ଟନ ଆରମ୍ଭ କରାଯିବ, କିନ୍ତୁ ତାହା ପୂର୍ବରୁ ଏହି ଯୋଗ୍ୟ ହିତାଧିକାରୀଙ୍କୁ ଜମି ପ୍ରଦାନ କରିବାକୁ ନିର୍ଦ୍ଦେଶ ଦିଆଯାଇଛି। ଚିଠିରେ ଜିଲ୍ଲାପାଳମାନଙ୍କୁ ସମୟସୀମା ଭିତରେ ସକାରାତ୍ମକ ପ୍ରତିକ୍ରିୟା ପ୍ରଦାନ କରି ‘ସମସ୍ତଙ୍କ ପାଇଁ ଆବାସ’ ଉଦ୍ଦେଶ୍ୟକୁ ସମ୍ପୂର୍ଣ୍ଣ କରିବାକୁ ଆହ୍ୱାନ ଜାଣାଯାଇଛି। ବିଭାଗର ଏହି ନିର୍ଦ୍ଦେଶକୁ କାର୍ଯ୍ୟକାରୀ କରି ଜିଲ୍ଲା ପ୍ରଶାସନଙ୍କୁ ରିପୋର୍ଟ ଦାଖଲ କରିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି ।
୨ ଲକ୍ଷ ଭୂମିହୀନ ପରିବାରଙ୍କୁ ମିଳିବ ଜମି
