ଅଭିବୃଦ୍ଧି ଇଞ୍ଜିନ ହେବାକୁ ଓଡ଼ିଶା ପ୍ରସ୍ତୁତ। ଓଡ଼ିଶା ନିବେଶକ ସମ୍ମିଳନୀ ହେଉଛି ଦୀର୍ଘକାଳୀନ ସହଭାଗିତା ଗଠନ କରିବାର ଏକ ମଞ୍ଚ, ଯାହା ନିବେଶ ପ୍ରସ୍ତାବକୁ କ୍ଷେତ୍ରସ୍ତରୀୟ ଫଳାଫଳରେ ପରିଣତ କରିବ। ହାଇଦରାବାଦରେ ଅନୁଷ୍ଠିତ ଓଡ଼ିଶା ନିବେଶକ ସମ୍ମିଳନୀରେ ଶିଳ୍ପ ନେତୃତ୍ବଙ୍କୁ ଉଦ୍ବୋଧନ ଦେବା ପରିପ୍ରେକ୍ଷୀରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଉପରୋକ୍ତ ମତ ରଖିଥିଲେ। ନୀତି ସ୍ଥିରତା, ପ୍ରତିଯୋଗିତାମୂଳକ ଖର୍ଚ୍ଚ ଏବଂ ଏକ ସହଜ ଶାସନ ଢାଞ୍ଚା ମାଧ୍ୟମରେ ରାଜ୍ୟ ନିଜକୁ ଭବିଷ୍ୟତ-ପ୍ରସ୍ତୁତ ନିବେଶ ଗନ୍ତବ୍ୟସ୍ଥଳ ଭାବରେ ପ୍ରତିଷ୍ଠା କରୁଛି ବୋଲି ମୁଖ୍ୟମନ୍ତ୍ରୀ କହିଥିଲେ। ଓଡ଼ିଶା ଜାତୀୟ ଦୃଷ୍ଟିକୋଣ ‘ପୂର୍ବୋଦୟ’ ଅଧୀନରେ ଏକ ମୁଖ୍ୟ ଗନ୍ତବ୍ୟସ୍ଥଳ ଭାବେ ଉଦୀୟମାନ ହେଉଛି, ଯାହା ଆର୍ଥିକ ଅନୁଶାସନ ଏବଂ ପ୍ରତିକ୍ରିୟାଶୀଳ ଶାସନ ଦ୍ୱାରା ସମ୍ଭବ ହୋଇପାରୁଛି । ଏହି କାର୍ଯ୍ୟକ୍ରମରେ ମୋଟ୍ ୬୭ ହଜାର କୋଟି ଟଙ୍କାର ପୁଞ୍ଜିନିବେଶ ପ୍ରସ୍ତାବ ଆସିଛି। ଏହାଦ୍ବାରା ରାଜ୍ୟରେ ୫୬ ହଜାର କର୍ମନିଯୁକ୍ତି ସୃଷ୍ଟି ହେବା ସମ୍ଭାବନା ରହିଛି। ୬୭ ହଜାର କୋଟି ଟଙ୍କା ନିବେଶ ପ୍ରସ୍ତାବ ମଧ୍ୟରୁ ୨୭ ହଜାର ୬୫୦ କୋଟି ଟଙ୍କା ନିବେଶ ସମ୍ଭାବନା ଥିବା ମୋଟ୍ ୧୩ଟି ବୁଝାମଣାପତ୍ର (ଏମଓୟୁ) ସ୍ବାକ୍ଷରିତ ହୋଇଥିଲା। ଏହା ୧୫ ହଜାର ୯୦୫ ନିଯୁକ୍ତି ସୁଯୋଗ ସୃଷ୍ଟି କରିବ। ଏଥିସହ ୩୧,୧୩୧ କୋଟି ଟଙ୍କାର ନିବେଶ ପ୍ରସ୍ତାବ ଗ୍ରହଣ କରାଯାଇଛି। ଯେଉଁଥିରେ ୪୦ ହଜାର ନିଯୁକ୍ତି ସୁଯୋଗ ସୃଷ୍ଟି ହେବା ସମ୍ଭାବନା ରହିଛି। ମୁଖ୍ୟମନ୍ତ୍ରୀ କହିଥିଲେ, ଶିଳ୍ପ ନେତୃତ୍ବଙ୍କ ସହ ସିଧାସଳଖ ସମ୍ପର୍କ ସ୍ଥାପନ, ଓଡ଼ିଶାର ବିବିଧ ଶିଳ୍ପ ପରିବ୍ୟବସ୍ଥାକୁ ପ୍ରଦର୍ଶନ ଏବଂ ପ୍ରାଥମିକତା ଓ ଉଦୀୟମାନ କ୍ଷେତ୍ରଗୁଡ଼ିକରେ ନିବେଶ ନିଷ୍ପତ୍ତିକୁ ତ୍ବରାନ୍ବିତ କରିବା ଉଦ୍ଦେଶ୍ୟରେ ଓଡ଼ିଶା ନିବେଶକ ସମ୍ମିଳନୀ ଆୟୋଜନ କରାଯାଇଥିଲା। ଶୀର୍ଷ କମ୍ପାନୀଗୁଡ଼ିକର ବରିଷ୍ଠ ନେତୃତ୍ବ, ଶିଳ୍ପ ସଂଘ ଏବଂ ବିଜିନେସ ଚାମ୍ବରଗୁଡ଼ିକୁ ଏହି କାର୍ଯ୍ୟକ୍ରମ ଏକାଠି କରିଥିଲା। ୫୦୦ରୁ ଅଧିକ ପ୍ରତିନିଧି କାର୍ଯ୍ୟକ୍ରମରେ ଉପସ୍ଥିତ ଥିଲେ। ଭାରତର ଶିଳ୍ପାୟନ ଅଭିବୃଦ୍ଧିର ବଦଳୁଥିବା ମାନଚିତ୍ର ସମ୍ପର୍କରେ ଦୃଷ୍ଟି ଆକର୍ଷଣ କରି ମୁଖ୍ୟମନ୍ତ୍ରୀ କହିଥିଲେ ଯେ, ପୂର୍ବୋଦୟର ଜାତୀୟ ଦୃଷ୍ଟିକୋଣ ଅଧୀନରେ ଓଡ଼ିଶା ଏକ ପ୍ରମୁଖ ଗନ୍ତବ୍ୟସ୍ଥଳ ଭାବରେ ଉଭା ହେଉଛି। ରାଜ୍ୟର ରଣନୈତିକ ସୁବିଧା ଉପରେ ମୁଖ୍ୟମନ୍ତ୍ରୀ ଆଲୋକପାତ କରିଥିଲେ। ଏହି କାର୍ଯ୍ୟକ୍ରମରେ ଫାର୍ମାସ୍ୟୁଟିକାଲ୍ସ, ମେଡିକାଲ ଉପକରଣ, ଅକ୍ଷୟ ଶକ୍ତି ଉପକରଣ, ବୟନ, ବୈଦ୍ୟୁତିକ, ଆଇଟି, ଡାଟା ସେଣ୍ଟର, ଅତ୍ୟାଧୁନିକ ବିନିର୍ମାଣ ଏବଂ ଆନୁଷଙ୍ଗିକ ଶିଳ୍ପ ଭଳି ପ୍ରମୁଖ ଏବଂ ଉଦୀୟମାନ କ୍ଷେତ୍ରଗୁଡ଼ିକରେ ଆଗ୍ରହ ଦେଖିବାକୁ ମିଳିଥିଲା। ମୁଖ୍ୟମନ୍ତ୍ରୀ ରାଜ୍ୟର ରଣନୈତିକ ସୁବିଧାଗୁଡ଼ିକୁ ଉଲ୍ଲେଖ କରି କହିଛନ୍ତି ଯେ, ଓଡ଼ିଶାରେ ଶିଳ୍ପ ସଂସ୍ଥାମାନେ ସୁଲଭ, ସମ୍ପ୍ରସାରଣରେ ସହଯୋଗୀ ଏବଂ ସରଳ ଅନୁମୋଦନ ପ୍ରକ୍ରିୟା ପାଇବେ। ସରକାର ଭାବେ ଆମର ଭୂମିକା ସ୍ପଷ୍ଟ ବିକାଶକୁ ଦୃଷ୍ଟିରେ ରଖି ସମୟାନୁବର୍ତ୍ତୀ ଅନୁମୋଦନ ନିଶ୍ଚିତ କରିବା ଏବଂ ନୀତି ସ୍ଥିରତା ପ୍ରଦାନ କରିବା ଯାହାଦ୍ୱାରା ନିବେଶକମାନେ ଶିଳ୍ପ ପ୍ରତିଷ୍ଠା ଏବଂ ସମ୍ପ୍ରସାରଣ ପ୍ରତି ଧ୍ୟାନ ଦେଇପାରିବେ ବୋଲି ମୁଖ୍ୟମନ୍ତ୍ରୀ କହିଛନ୍ତି। ଶିଳ୍ପ ମନ୍ତ୍ରୀ ସମ୍ପଦ ଚନ୍ଦ୍ର ସ୍ବାଇଁ କହିଥିଲେ ଯେ, ଓଡ଼ିଶା ନିବେଶକ ସମ୍ମିଳନୀର ଦୃଢ଼ ପ୍ରତିକ୍ରିୟା ଓଡ଼ିଶାର ନୀତି ଏବଂ ଶାସନ ମଡେଲ ପ୍ରତି ବିଶ୍ବାସକୁ ଦର୍ଶାଉଛି। ରାଜ୍ୟ ପ୍ରଭାବଶାଳୀ କାର୍ଯ୍ୟାନ୍ବୟନ, ନିରନ୍ତର ସମ୍ପୃକ୍ତି ଏବଂ ନିବେଶକଙ୍କ ପାଇଁ ସୁଗମ ସୁବିଧା ସୁନିଶ୍ଚିତ କରିବାକୁ ପ୍ରତିଶ୍ରୁତିବଦ୍ଧ।
ହାଇଦରାବାଦରୁ ୬୭ ହଜାର କୋଟିର ନିବେଶ ପ୍ରସ୍ତାବ
