ପହଲଗାମ ଆତଙ୍କବାଦୀ ଆକ୍ରମଣ ଘଟଣା ପରେ ଦେଶର ସମସ୍ତ ପ୍ରମୁଖ ପର୍ଯ୍ୟଟନସ୍ଥଳ ଏବେ ହାଇ ଆଲର୍ଟରେ ରହିଛି ରାଜ୍ୟର ମନ୍ଦିର ଓ ପର୍ଯଟନସ୍ଥଳ ଆଦି ଉପରେ ମଧ୍ୟ ଏବେ କଡ଼ା ନଜରରେ ରହିଥିବାବେଳେ ନ୍ୟାସନାଲ ସିକ୍ୟୁରିଟ୍ ଗାର୍ଡ ବା ଏନଏସଜିର ୩ ଜଣିଆ ଟିମ୍ ପୁରୀ ଶ୍ରୀମନ୍ଦିରର ସୁରକ୍ଷା ବ୍ୟବସ୍ଥା ଯାଞ୍ଚ କରିଛି । ହେଲେ ଏସବୁ ମଧ୍ୟରେ ଲିଙ୍ଗରାଜ ମନ୍ଦିର ବେଢ଼ାରେ ବଲିଉଡ୍ ଅଭିନେତ୍ରୀମାନଙ୍କର ଗୋଟିଏ ପରେ ଗୋଟିଏ ଫଟୋ ସୋସିଆଲ ମିଡିଆରେ ଘୁରି ବୁଲିବା ସମସ୍ତଙ୍କୁ ଆଶ୍ଚର୍ଯ୍ୟ ଚକିତ କରିଛି।
ସପ୍ତାହକ ମଧ୍ୟରେ ଲିଙ୍ଗରାଜ ମନ୍ଦିର ବେଢ଼ରୁ ୨ ଜଣ ଅଭିନେତ୍ରୀଙ୍କ ଫଟୋ ଭାଇରାଲ ହୋଇଥିଲା । ଚଳିତମାସ ୩ ତାରିଖ ଦିନ ଲିଙ୍ଗରାଜ ମନ୍ଦିର ବେଢା ଫଟୋ ଭାଇରାଲ ହୋଇଥିଲା । ବଲିଉଡ ଅଭିନେତ୍ରୀ ସୁସ୍ମିତା ସେନ ଭୁବନେଶ୍ୱରରେ ଏକ କାର୍ଯ୍ୟକ୍ରମରେ ଯୋଗଦେବାକୁ ଆସିଥିବାବେଳେ ପ୍ରଭୁ ଲିଙ୍ଗରାଜଙ୍କ ଦର୍ଶନ କରିଥିଲେ । ମହାପ୍ରଭୁଙ୍କ ଦର୍ଶନ କରିବା ସହ ମନ୍ଦିର ବେଢା ଭିତରେ ଫଟୋ ଉଠାଇଥିଲେ । ସୁସ୍ମିତାଙ୍କ ଫଟୋ ଉଠାଇଥିବା ସେବାୟତ ସୋସିଆଲ ମିଡିଆରେ ଏହି ଫଟୋ ସେୟାର କରିଥିଲେ। ଏବେ ଅଭିନେତ୍ରୀ ଅପସରା ରାଣୀଙ୍କ ସୋସିଆଲ୍ ମିଡ଼ିଆରେ ଲିଙ୍ଗରାଜ ମନ୍ଦିର ବେଢ଼ା ଫଟୋ ଘୁରି ବୁଲୁଛି ।
ସେପଟେ ଏଭଳି ଘଟଣା ଦୈନନ୍ଦିନ ଭାବେ ନଜରକୁ ଆସୁଥିବା ନିଯୋଗ ସମ୍ପାଦକ ତଥା ସଦସ୍ୟମାନେ ମତପ୍ରକାଶ କରିଛନ୍ତି । ସେଲିବ୍ରିଟି ଆସିଲେ କାହିଁକି ତାଙ୍କ ଫୋନ୍ ଯାଞ୍ଚ ହେଉନାହିଁ । ସେ ଯେକେହି ବି ହୁଅନ୍ତୁ ନା ନାହିଁ ମନ୍ଦିର ଭିତରକୁ ମେବାଇଲ୍ ନେବା ନିଷେଧ ଥିବାବେଳେ କିପରି ବେଧଡ଼କ ଭାବେ ମନ୍ଦିର ଭିତରକୁ ମୋବାଇଲ୍ ଯାଉଛି ସେନେଇ ନିଯୋଗ କର୍ମକର୍ତ୍ତା ଓ ସେବାୟତମାନେ ପ୍ରଶ୍ନ କରଛନ୍ତି । ମନ୍ଦିର ପ୍ରଶାସନ ଏଥିପ୍ରତି ଅଧିକ ଧ୍ୟାନ ଦେବା ଜରୁରୀ ଓ ଲିଙ୍ଗରାଜ ଥାନା ପୋଲିସ୍ ମଧ୍ୟ ସିଂହଦ୍ବାର ନିକଟରେ ମୋବାଇଲ୍ ଯାଞ୍ଚକୁ ଗୁରୁତ୍ବ ଦେଉ ବୋଲି ଦାବି ହୋଇଛି ।
ସେପଟେ କେବଳ ସୁସ୍ମିତା କି ଅପସରାରାଣୀ ନୁହଁନ୍ତି, ପୂର୍ବରୁ ଶିଳ୍ପା ସେଟ୍ଟୀଙ୍କ ଫଟୋ ମଧ୍ୟ ଭାଇରାଲ ହୋଇଥିଲା । ଏପରିକି କିଛି ରାଜନେତାଙ୍କ ଫଟୋ ବେଢ଼ା ଭିତରେ ଭାଇରାଲ ହେବା ପରେ ମନ୍ଦିର ସୁରକ୍ଷା ନେଇ ଅନେକ ପ୍ରଶ୍ନବାଚୀ ସୃଷ୍ଟି ହୋଇଥିଲା । ପରେ ମନ୍ଦିର ପ୍ରଶାସନ ପକ୍ଷରୁ ଯାଞ୍ଚକୁ ଗୁରୁତ୍ବ ଦିଆଯାଇଥିଲା। ଫଳରେ କିଛଇ ଦିନ ମନ୍ଦିର ବେଢ଼ା ଫଟୋ ଭାଇରାଲ ହୋଇପାରି ନଥିଲାଲା। ହେଲେ ଏବେ ପୁଣି ସମାନ ସ୍ଥିତି ଦେଖିବାକୁ ମିଳୁଛି । ଏନେଇ ମନ୍ଦିର ପ୍ରଶାସନିକ ଅଧିକାରୀଙ୍କ କୌଣସି ପ୍ରତିକ୍ରିୟା ମିଳିନଥିବାବେଳେ ସାଧାରଣରେ ଅସନ୍ତୋଷ ପ୍ରକାଶ ପାଇଛି । ସାଧାରଣ ଲୋକଙ୍କ ଲାଗି ଥିବା ନିୟମ ବଡ଼ ବଡ଼ିଆଙ୍କ ଲାଗି କାହିଁ ଲାଗୁ ହେବ ନାହିଁ ବୋଲି ଜନସାଧାରଣ ପ୍ରଶ୍ନ କରିଛନ୍ତି।
By
