ଅବିଭାଷଣରେ ଲୋକ ପ୍ରତିନିଧିଙ୍କୁ ରାଷ୍ଟ୍ରପତିଙ୍କ ପରାମର୍ଶ ଗୃହରେ ଓ ଗୃହ ବାହାରେ ଜନପ୍ରତିନିଧିଙ୍କ ଆଚରଣ ଠିକ୍ ରହିବା ଦରକାର ଆଜି ମୁଁ ଯେଉଁଠି ଅଛି ତାହାର ଶ୍ରେୟ ଏହି ଗୃହର ମହତାବ, ବିଜୁ ପଟ୍ଟାନୟକଙ୍କ ସମେତ ବହୁ ନିର୍ମାତାଙ୍କୁ ମନେପକାଇଲେ ଓଡ଼ିଶା ବିଧାନସଭାରେ ନାରୀଙ୍କ ପ୍ରତିନିଧିତ୍ବ ବଢ଼ିଛି ଓଡ଼ିଶାର ପ୍ରଗତିକୁ ଜୀବନର ବ୍ରତ ଭାବେ ଗ୍ରହଣ କରନ୍ତୁ ଭୁବନେଶ୍ବର, ତା ୨୭୧୧ (ପିଏନଏସ): ଜନତା ଭାଗ୍ୟବିଧାତା, ସେମାନଙ୍କ ହାତରେ ଅସୀମ କ୍ଷମତା ରହିଛି। ଆପଣମାନେ କେବଳ ତାଙ୍କର ପ୍ରତିନିଧି ଓ ସେବକ। ଜନତାଙ୍କ ଆଶା-ଆକାଂକ୍ଷା ଓ ସ୍ବପ୍ନ ପୂରଣ କରିବା ଆପଣଙ୍କର ପରମ କର୍ତ୍ତବ୍ୟ… ଏହି ମର୍ମସ୍ପର୍ଶୀ ପରାମର୍ଶ ଦେଇ ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁ ଗୁରୁବାର ଓଡ଼ିଶା ବିଧାନସଭାରେ ଐତିହାସିକ ଅଭିଭାଷଣ ଦେଇଛନ୍ତି। ସପ୍ତଦଶ ବିଧାନସଭାର ଶୀତ ଅଧିବେଶନର ପ୍ରଥମ ଦିନରେ ରାଷ୍ଟ୍ରପତିଙ୍କ ଏହି ଅଭିଭାଷଣ ବିଧାନସଭା ଇତିହାସରେ ଏକ ସୁବର୍ଣ୍ଣ ଅଧ୍ୟାୟ ଭାବେ ଲିପିବଦ୍ଧ ହୋଇଛି। ରାଷ୍ଟ୍ରପତି ଶ୍ରୀମତୀ ମୁର୍ମୁ ନିଜ ଅଭିଭାଷଣରେ କହିଥିଲେ ଯେ, ଗୃହ ଭିତରେ ଓ ଗୃହ ବାହାରେ ବିଧାୟକଙ୍କ ଆଚରଣ ଓ ଉଚ୍ଚାରଣ ଅତ୍ୟନ୍ତ ମୂଲ୍ୟବାନ। ଟେକ୍ନୋଲୋଜିର ଯୁଗରେ ସମସ୍ତେ ସବୁ ଦେଖୁଛନ୍ତି ଏବଂ ଅନୁସରଣ କରୁଛନ୍ତି। ତେଣୁ ସଞ୍ଜମତା ଓ ସଚ୍ଚୋଟତା ରକ୍ଷା କରି ଲୋକଙ୍କ ହିତରେ କାର୍ଯ୍ୟ କରିବାକୁ ପରାମର୍ଶ ଦେଇଛନ୍ତି। ଉତ୍କଳ ମଣି ପଣ୍ଡିତ ଗୋପବନ୍ଧୁ ଦାସଙ୍କ ବନ୍ଦିତ କବିତା – “ପ୍ରଜା ଲାଗି କଲେ ପ୍ରଜାପତି ସୃଷ୍ଟି, ପ୍ରଜା ଲାଗି ଇନ୍ଦ୍ର କଲେ ଜଳ ବୃଷ୍ଟି…” ଉଦ୍ଧୃତ କରି ରାଷ୍ଟ୍ରପତି କହିଛନ୍ତି ଯେ, ରାଷ୍ଟ୍ର ଓ ରାଜ୍ୟ ପ୍ରଜା ପାଇଁ ଅଟେ ଏବଂ ପ୍ରଜାର ସେବା ହିଁ ସର୍ବୋଚ୍ଚ ଧର୍ମ। ଓଡ଼ିଶା ବିଧାନସଭାକୁ ସମ୍ବୋଧିତ କରିବା ଅବସରରେ ରାଷ୍ଟ୍ରପତି ଭାବପ୍ରବଣ ହୋଇ କହିଥିଲେ ଯେ, “ଏ ମୋର ଘରକୁ ଫେରିବା ଭଳି ଅନୁଭବ ହେଉଛି। ଆଜି ମୁଁ ଯାହା ଅଛି, ଏହି ପବିତ୍ର ଗୃହର ଋଣ ଏବଂ ମହାପ୍ରଭୁ ଜଗନ୍ନାଥଙ୍କ କୃପା ବିନା ଏଠି ପହଞ୍ଚି ନ ଥାନ୍ତି।” ଏହି ଗୃହରେ ବିଧାୟିକା ଭାବେ ପ୍ରଶ୍ନ ପଚାରିବାଠାରୁ ଆରମ୍ଭ କରି ମନ୍ତ୍ରୀ ଭାବେ ଉତ୍ତର ଦେବା ପର୍ଯ୍ୟନ୍ତ ତାଙ୍କ ରାଜନୈତିକ ଯାତ୍ରାର ସ୍ମୃତିକୁ ମନେ ପକାଇ ଦେଇ ରାଷ୍ଟ୍ରପତି କହିଥିଲେ ଯେ, ଏଠି ଉପସ୍ଥିତ ପୂର୍ବତନ ବିଧାୟକ ତଥା ସହକର୍ମୀଙ୍କୁ ଦେଖି ଅତ୍ୟନ୍ତ ଆବେଗପ୍ରବଣ ହୋଇଛନ୍ତି। ଓଡ଼ିଶାର ଐତିହ୍ୟ, ସଂସ୍କୃତି ଓ ସମ୍ଭାବନାକୁ ସ୍ମରଣ କରାଇ ରାଷ୍ଟ୍ରପତି କହିଛନ୍ତି ଯେ, କଳିଙ୍ଗର ଚଣ୍ଡାଶୋକକୁ ଧର୍ମାଶୋକରେ ପରିଣତ କରିଥିବା ଏ ପୁଣ୍ୟଭୂମିରେ ପ୍ରାଚୀନ ନୌବାଣିଜ୍ୟ, ଇଂରେଜ ବିରୋଧୀ ସ୍ଵାଧୀନତା ସଂଗ୍ରାମ ଓ ମହତାବ, ବିଜୁ ପଟ୍ଟନାୟକଙ୍କ ଭଳି ମହାନ ନେତାଙ୍କ ଅବଦାନ ଅତୁଳନୀୟ । ଓଡ଼ିଶା ପ୍ରକୃତିଗତ ଓ ମାନବ ସମ୍ବଳରେ ପରିପୂର୍ଣ୍ଣ। ଏହି ସମ୍ପଦର ସଦୁପଯୋଗ କରି ୨୦୩୬ ସୁଦ୍ଧା ଏକ ସମୃଦ୍ଧ ଓଡ଼ିଶା ଗଢ଼ି ତୋଳା ସମ୍ଭବ ଏବଂ ତାହା ହିଁ ବିକଶିତ ଭାରତ ନିର୍ମାଣରେ ଓଡ଼ିଶାର ସର୍ବୋତ୍କୃଷ୍ଟ ଅବଦାନ ହେବ ବୋଲି ସେ କହିଥିଲେ। ଶ୍ରୀମତୀ ମୁର୍ମୁ କହିଥିଲେ, ଓଡ଼ିଶା ପ୍ରଗତି ପଥରେ ଦ୍ରୁତ ଗତିରେ ଆଗକୁ ଚାଲିଛି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ
ବିଧାନସଭା ପରିସରରେ ସ୍ବାଗତ କରି ବାଚସ୍ପତି ପାଛୋଟି ନେଲେ ରାଷ୍ଟ୍ରପତି ଦ୍ରୌପଦୀ ମୂର୍ମୂଙ୍କୁ ବିଧାନସଭା ପରିସରରେ ରାଜ୍ୟପାଳ ହରିବାବୁ କମ୍ଭମପାଟି, ବାଚସ୍ପତି ସୁରମା ପାଢୀ, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଉପ ବାଚସ୍ପତି ଭବାନୀ ଶଙ୍କର ଭୋଇ, ବିଧାନସଭା ସଚିବ ସତ୍ୟବ୍ରତ ରାଉତ ପ୍ରମୁଖ ସ୍ବାଗତ କରିଥିଲେ । ରାଷ୍ଟ୍ରପତିଙ୍କୁ ପୁଷ୍ପଗୁଚ୍ଛ ଦେଇ ସ୍ବାଗତ କରିବା ପରେ ବାଚସ୍ପତି ତାଙ୍କୁ ଗୃହକୁ ପାଛୋଟି ନେଇଥିଲେ । ଅନନ୍ତ ପୁଅ, ଝିଅଙ୍କ ବାହାଘର କଲଣି ? ରାଷ୍ଟ୍ରପତି ଦ୍ରୌପଦୀ ମୂର୍ମୂ ବିଧାନସଭାରେ ନିଜ ଅଭିଭାଷଣ ରଖିବା ପରେ ପରିସରରେ କିଛି ସମୟ ଅତିବାହିତ କରିଥିଲେ । ତାଙ୍କ ପୂରୁଣା ପ୍ରକୋଷ୍ଠକୁ ଯାଇ ପୂର୍ବତନ ଜନପ୍ରତିନିଧି, ବର୍ତ୍ତମାନର ଜନପ୍ରତିନିଧିଙ୍କୁ ଭେଟି ଆଲୋଚନା କରିଥିଲେ । ଏହାରି ମଧ୍ୟରେ ସେ ଓଡିଶା ସରକାରେ ମନ୍ତ୍ରୀ ଥିବାବେଳେ ତାଙ୍କର ଜଣେ ପୂରୁଣା କର୍ମଚାରୀଙ୍କୁ ଦେଖି ଡାକିଥିଲେ । ଅନନ୍ତ ଚରଣ ବେହେରା ଯିଏ ପୂର୍ବରୁ ଶ୍ରୀମତି ମୂର୍ମୂଙ୍କ କାର୍ଯ୍ୟାଳୟରେ ଦମାଦାର ଭାବେ କାର୍ଯ୍ୟ କରିଥିଲେ, ତାଙ୍କୁ ଦେଖିବା ପରେ ରାଷ୍ଟ୍ରପତି ତାଙ୍କୁ ଡାକି ଭଲମନ୍ଦ ପଚାରି ବୁଝିଥିବା ଅନନ୍ତ ବେହେରା ସୂଚନା ଦେଇଛନ୍ତି । କର୍ମଚାରୀ ଜଣକ କହିଛନ୍ତି ଯେ, ରାଷ୍ଟ୍ରପତି ତାଙ୍କ ସହ କଥା ହୋଇଛନ୍ତି । ପିଲାଙ୍କ କଥା ବୁଝିଲେ । ମାଡାମ ବହୁ ଭଲ । ଯେମିଥି ଥିଲେ ସେମିତି । ସେତେବେଳେ ତାଙ୍କ ବ୍ୟବହାର ଯେଭଳି ଥିଲା, ଏବେ ବି ସେମିତି । ଅନନ୍ତା ଭଲ ଅଛ ବୋଲି ପଚାରିଲେ । ପୁଅ ଝିଅ ବାହା କରିସାରିଲଣି କି ନାହିଁ ବୋଲି ପଚାରିଲେ । ମନ୍ତ୍ରୀ ଥିବା ବେଳେ ଆମ ସହ ତଳେ ବସି ଖାଉଥିଲେ । ରାକ୍ଷୀ ପୂର୍ଣିମାରେ ସମସ୍ତଙ୍କୁ ରାକ୍ଷୀ ବାନ୍ଧୁଥିଲେ ବୋଲି କହି ଅନନ୍ତ ଖୁସୀବ୍ୟକ୍ତ କରିଛନ୍ତି ।୧୧ ନମ୍ବର ରୁମରେ ସମୟ ବିତାଇଲେ, ପୁରୁଣା ସହକର୍ମୀଙ୍କ ସହ କଥା ହେଲେ ବିଧାନସଭାରେ ଅଭିଭାଷଣ ରଖିବା ପରେ ରାଷ୍ଟ୍ରପତି ପରିସରରେ ଥିବା ରୁମ୍ ନମ୍ବର-୧୧କୁ ପରିଦର୍ଶନ କରିଥିଲେ, ଯେଉଁ ପ୍ରକୋଷ୍ଠରେ ସେ ୨୦୦୦- ୨୦୦୪ ମଧ୍ୟରେ ବିଜେପି-ବିଜେଡି ମେଣ୍ଟ ସରକାର ସମୟରେ ମନ୍ତ୍ରୀ ଥିବା ବେଳେ ବସି କାର୍ଯ୍ୟ କରିଥିଲେ। ଏହି ଚେମ୍ବରକୁ ବିଶେଷ ଭାବେ ପ୍ରସ୍ତୁତ କରାଯାଇଥିବା ବେଳେ ରାଷ୍ଟ୍ରପତି ସେଠାରେ କିଛି ସମୟ ବିତାଇ ତାଙ୍କ ପୁରୁଣା ସ୍ମୃତି ସତେଜ କରିଥିଲେ । ଏହିଠାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ବାଚସ୍ପତି ସୁରମା ପାଢୀ, ବିରୋଧୀ ଦଳ ନେତା ନବୀନ ପଟ୍ଟନାୟକ, ବିଜେଡି ବରିଷ୍ଠ ବିଧାୟିକା ପ୍ରମିଳା ମଲ୍ଲିକ, କଂଗ୍ରେସ ବରିଷ୍ଠ ବିଧାୟକ ତାରା ପ୍ରସାଦ ବାହିନୀପତି, ଉପ ମୁଖ୍ୟମନ୍ତ୍ରୀ କେଭି ସିଂ ଦେଓ, ବିଜେଡି ବରିଷ୍ଠ ବିଧାୟକ ରଣେନ୍ଦ୍ର ପ୍ରତାପ ସ୍ବାଇଁ ପ୍ରମୁଖଙ୍କ ସହ ରାଷ୍ଟ୍ରପତି କଥା ହୋଇଥିଲେ।
କହିଛନ୍ତି, “ମୁଁ ଅସୁସ୍ଥ ଥାଇ ମଧ୍ୟ ରାଷ୍ଟ୍ରପତିଙ୍କୁ ଭେଟିବା ଲାଗି ଆସିଥିଲି। ସେ ନିଜେ ମୋତେ ଡାକିଥିଲେ। ବହୁତ ଖୁସୀରେ ମୋ ସ୍ବାସ୍ଥ୍ୟ ପଚାରିଲେ। ସମସ୍ତଙ୍କ ସହ ଜଣ ଜଣେ କରି କଥା ହେଲେ। କୋରାପୁଟର ଖବର ପଚାରିଲେ, କୋରାପୁଟ ଆସିବି ବୋଲି କହିଲେ। ଢେମସା ନାଚ କଥା ପଚାରିଲେ ଏବଂ ଢେମସାକୁ ଦିଲ୍ଲୀ ନେବା କଥା କହିଲେ। ମୋ ଜୀବନର ଏତେ ଅସୁସ୍ଥ ସମୟରେ ରାଷ୍ଟ୍ରପତି ଏତେ ସ୍ନେହ ଦେଖାଇ ମୋ ସହ କଥା ହେଲେ, ମୁଁ ବହୁତ ବହୁତ ଖୁସି ଓ ଆନନ୍ଦିତ। ଏ ଦିନ ମୋ ଜୀବନରେ କେବେ ବି ଭୁଲି ହେବ ନାହିଁ। ଆମର ରାଜ୍ୟର ଝିଅ ଆଜି ଦେଶର ରାଷ୍ଟ୍ରପତି ହୋଇ ଆମ ସମସ୍ତଙ୍କୁ ଗର୍ବିତ କରିଛନ୍ତି। ରଣେନ୍ଦ୍ର ପ୍ରତାପ ସ୍ବାଇଁ, ବରିଷ୍ଠ ବିଜେଡି ବିଧାୟକ ସପ୍ତଦଶ ବିଧାନସଭାର ଶୀତ ଅଧିବେଶନର ପ୍ରଥମ ଦିନରେ ରାଷ୍ଟ୍ରପତିଙ୍କ ଅଭିଭାଷଣ ପରେ ବିଧାନସଭା ପରିସରରେ ରାଷ୍ଟ୍ରପତି ମୁର୍ମୁ ବରିଷ୍ଠ ବିଧାୟକ ଶ୍ରୀ ସ୍ବାଇଁଙ୍କ ସହ ବହୁତ ପୁରୁଣା ସ୍ମୃତି ମନେ ପକାଇଥିବା ସେ କହିଛନ୍ତି । ଗଣମାଧ୍ୟମକୁ ପ୍ରତିକ୍ରିୟା ରଖି ଶ୍ରୀ ସ୍ବାଇଁ କହିଛନ୍ତି, “ଆମେ ସମାନ ମନ୍ତ୍ରୀମଣ୍ଡଳରେ ଥିଲୁ। ରାଷ୍ଟ୍ରପତି ମୋତେ କହିଲେ, ‘ଆପଣ ଏ ଗୃହର ସର୍ବପୁରାତନ ସଦସ୍ୟ ଆପଣ ଅଛନ୍ତି’। ମୁଁ କହିଲି, ‘ଆପଣ ଦେଶର ସର୍ବଶ୍ରେଷ୍ଠ ନାଗରିକ, ଆପଣଙ୍କ ପାଇଁ ଆମେ ଗର୍ବିତ’। ମୁଁ ପଚାରିଲି, ‘ମୋତେ ମନେ ରଖିଛନ୍ତି ନା ନାହିଁ?’ ସେ ହସି ହସି କହିଲେ, ‘ଆମର ସମ୍ପର୍କ ବହୁତ ନିବିଡ଼ ଥିଲା’। ଏତେ ବର୍ଷ ପରେ ମଧ୍ୟ ଏତେ ସ୍ନେହ ଦେଖି ମୁଁ ବହୁତ ଆନନ୍ଦିତ।”ରାଷ୍ଟ୍ରପତିଙ୍କ ଅଭିଭାଷଣ ବିଷୟରେ ଶ୍ରୀ ସ୍ବାଇଁ କହିଛନ୍ତି, ସେ ସାରା ଭାରତବର୍ଷର ଲୋକଙ୍କୁ ଆଚରଣ ଓ ଉଚ୍ଚାରଣ ବିଷୟରେ ଯେଉଁ ପରାମର୍ଶ ଦେଇଛନ୍ତି, ତାହା ସରକାରୀ ଦଳ ପାଇଁ ଯେମିତି ପ୍ରାଯୁଜ୍ୟ, ସେମିତି ବିରୋଧୀ ଦଳ ପାଇଁ ମଧ୍ୟ ପ୍ରାଯୁଜ୍ୟ। ସରକାରୀ ଦଳ ଓ ସରକାରୀ କର୍ମଚାରୀଙ୍କ ପାଇଁ ବି ଏହା ସମାନ ଭାବେ ଲାଗୁ ହେବ। ଗୃହରେ ବିରୋଧୀ ଦଳ ଯାହା କହିବେ ତାହା ଗଣତନ୍ତ୍ରର ପରମ୍ପରା। ଲୋକଙ୍କ ପ୍ରସଙ୍ଗକୁ ଏଡ଼ାଇ ଗଲେ ହେବ ନାହିଁ। ଲୋକଙ୍କ ସବୁ କଥା ଏ ଗୃହରେ ଉପସ୍ଥାପନ କରିବାକୁ ରାଷ୍ଟ୍ରପତି ପରାମର୍ଶ ଦେଇଛନ୍ତି। ଏହା ଆମ ସମସ୍ତଙ୍କ ପାଇଁ ଏକ ମହାନ ବାର୍ତ୍ତା। ଆମେ ସମସ୍ତେ ଏହାକୁ ହୃଦୟଙ୍ଗମ କରି କାର୍ଯ୍ୟକାରୀ କରିବା ଉଚିତ।
ମୁଁ ଭଉଣୀ… ବିଧାନସଭା ପରିସରରେ ଫଟୋ ଉଠାଇବା ସମୟରେ ଏକ ନିଆରା ଦୃଶ୍ୟ ଦେଖିବାକୁ ମିଳିଥିଲା। ରାଷ୍ଟ୍ରପତି ଆସିବା ସମୟରେ ନବୀନ ଛିଡ଼ା ହୋଇଥିଲେ। ରାଷ୍ଟ୍ରପତି ତାଙ୍କୁ କହିଲେ ବସନ୍ତୁ। ଏହି ସମୟରେ ଅନ୍ୟମାନେ କହିଲେ ଯେ ପ୍ରୋଟୋକଲ ଅନୁସାରେ ଆପଣ (ରାଷ୍ଟ୍ରପତି) ଆଗ ବସିବେ। ହେଲେ ସେ କହିଥିଲେ ଯେ, ମୁଁ ଭଉଣୀ। ଭାଇ ଆଗ ବସନ୍ତୁ। ସେହି ସମୟର ଏଭଳି ମୁହୂର୍ତ୍ତ ସମ୍ପର୍କରେ ପୂର୍ବତନ ବିଧାୟକ ସୁରେଶ ରାଉତରାୟ ଗଣମାଧ୍ୟମରେ ସୂଚନା ଦେଇଛନ୍ତି।ଅପରାହ୍ଣରେ ଗୃହକାର୍ଯ୍ୟ ଆରମ୍ଭ ହେବା ପରେ ବାଚସ୍ପତି ସୁରମା ପାଢୀ ରାଷ୍ଟ୍ରପତି ଦ୍ରୌପଦୀ ମୂର୍ମୂ, ରାଜ୍ୟପାଳ ହରିବାବୁ କମ୍ଭମପାଟି, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ମନ୍ତ୍ରୀମଣ୍ଡଳ, ସମସ୍ତ ସାଂସଦ, ସମସ୍ତ ପୂର୍ବତନ ସଦସ୍ୟା ସଦସ୍ୟ ଓ ଅନ୍ୟ ସମସ୍ତ ଅତିଥିଙ୍କୁ ସ୍ବାଗତ କରିଥିଲେ । ବାଚସ୍ପତି କହିଥିଲେ ଯେ, ଏହି ଐତିହାସିକ ମୂହୁର୍ତ୍ତରେ ଓଡିଶା ମାଟିର ସୁକନ୍ୟା ଐରଖାରବେଳଙ୍କର ଦାୟାଦ, ଭଞ୍ଜ ମାଟିର ଗର୍ବ ଓ ଗୌରବ, ଓଡିଶା ଜନଜାତି ସମ୍ପ୍ରଦାୟର ସୁଯୋଗ୍ୟା ସନ୍ତାନ ଏବଂ ମହିଳା ସଶକ୍ତିକରଣର ଅନନ୍ୟ ଉଦାହରଣ ଭାରତର ରାଷ୍ଟ୍ରପତିଙ୍କୁ ମୁଁ ସ୍ବାଗତ ଜଣାଉଛି । 2007 ମସିହାରେ ଓଡିଶାର ପ୍ରଥମ ମହିଳା ଶ୍ରେଷ୍ଠ ବିଧାୟକ ଭାବେ ପଣ୍ଡିତ ନିଳକଣ୍ଠ ଦାସ ସମ୍ମାନରେ ସମ୍ମାନିତ ହୋଇଥିଲେ।
