କାଳିଆ କାମରେ ଲାଗି ପଡ଼ିଛନ୍ତି କୁନି ରୂପକାର ସେବକ

ରଥଖଳାରେ ଜୋରଦାର କାମ: ମହାପ୍ରଭୁଙ୍କ ରଥଯାତ୍ରା ପାଇଁ ପ୍ରସ୍ତୁତି

ମହାପ୍ରଭୁ ଶ୍ରୀଜଗନ୍ନାଥଙ୍କ ବିଶ୍ୱପ୍ରସିଦ୍ଧ ରଥଯାତ୍ରା ପାଇଁ ରଥଖଳାରେ ଜୋରଦାର ପ୍ରସ୍ତୁତି ଚାଲିଛି। କୁନି ରୂପକାର ସେବକମାନେ ନିଷ୍ଠାର ସହ ରଥ ନିର୍ମାଣ କାର୍ଯ୍ୟରେ ଲାଗିଛନ୍ତି। ଗତକାଲି ସୁଦ୍ଧା ତିନି ରଥର ୪୨ଟି ଚକ ନିର୍ମାଣ ସରିଥିବା ବେଳେ ଗରଗରା ଓ ଚାରି ନାହାକା ନିର୍ମାଣ ଆରମ୍ଭ ହୋଇଛି। ତାଳଧ୍ୱଜ ଓ ଦର୍ପଦଳନ ରଥର ଦୁଇଟି ଲେଖାଏଁ ଗରଗରା ଚଉପଟ କାର୍ଯ୍ୟ ଶେଷ ପର୍ଯ୍ୟାୟରେ ରହିଛି। ନନ୍ଦିଘୋଷ ରଥର ଦୁଇ ଗରଗରା ଚଉପଟ କାର୍ଯ୍ୟ ମଧ୍ୟ ସମାପ୍ତ ହୋଇଛି। ଏହା ସହ କୋଣ ଗୁଜରେ ସିଂହ ଓ ବିରାଳ ରୂପ ଖୋଦେଇ ଶେଷ ହୋଇଥିବା ବେଳେ ରୂପଗୁଡ଼ିକର ପଲିସ୍ କାର୍ଯ୍ୟ ଅନ୍ତିମ ପର୍ଯ୍ୟାୟରେ ରହିଛି।

ଗଜପତି ମହାରାଜା ରଥଖଳା ପରିଦର୍ଶନ କରି ନିର୍ମାଣ କାର୍ଯ୍ୟର ସମୀକ୍ଷା କଲେ

ଗଜପତି ମହାରାଜା ଦିବ୍ୟସିଂହ ଦେବ ରଥଖଳା ପରିଦର୍ଶନ କରି ନିର୍ମାଣ କାର୍ଯ୍ୟର ସମୀକ୍ଷା କରିଛନ୍ତି। ମହାରଣା ସେବାୟତଙ୍କ ସହ ଆଲୋଚନା କରି ରଥ କାଠ ସମସ୍ୟା ଓ ବର୍ଷା ଯୋଗୁଁ ନିର୍ମାଣ କାର୍ଯ୍ୟ ପ୍ରଭାବିତ ନ ହେବା ନେଇ ସୁନିଶ୍ଚିତ ହୋଇଛନ୍ତି। ମହାରଣା ସେବାୟତ ଗଜପତିଙ୍କୁ ଜଣାଇଛନ୍ତି ଯେ ରଥକାଠ ଜନିତ କୌଣସି ସମସ୍ୟା ନାହିଁ।

ଜୁନ୍ ୨୭ରେ ରଥଯାତ୍ରା: ନୀତି ନିର୍ଘଣ୍ଟ ସ୍ଥିର, କାମ ଜାରି

ଆସନ୍ତା ଜୁନ୍ ୨୭ରେ ପୁରୀରେ ରଥଯାତ୍ରା ଅନୁଷ୍ଠିତ ହେବ। ସକାଳ ୬ଟାରୁ ମଙ୍ଗଳ ଆଳତି ନୀତି ଆରମ୍ଭ ହେବା ସହ ସକାଳ ୯ଟା ସୁଦ୍ଧା ରଥ ପ୍ରତିଷ୍ଠା ନୀତି ସମ୍ପନ୍ନ ହେବ। ଅପରାହ୍ନ ସାଢେ ୨ଟାରୁ ସାଢେ ୩ଟା ମଧ୍ୟରେ ଛେରାପହଁରା ଓ ଅପରାହ୍ନ ୪ଟାରେ ରଥ ଟଣା ହେବ। ଜୁନ୍ ୧୧ରେ ଦେବସ୍ନାନ ପୂର୍ଣ୍ଣିମା ଓ ଜୁଲାଇ ୬ରେ ସୁନାବେଶ ଅନୁଷ୍ଠିତ ହେବ। ବାହୁଡ଼ା ଦିନ ଅପରାହ୍ନ ୪ଟା ସୁଦ୍ଧା ରଥ ଟାଣିବା ପାଇଁ ନୀତି ନିର୍ଘଣ୍ଟ ସ୍ଥିରୀକୃତ ହୋଇଛି। ଏହି ପରମ୍ପରା ସହ ମହାପ୍ରଭୁଙ୍କ ରଥଯାତ୍ରା ଭକ୍ତମାନଙ୍କୁ ଆଧ୍ୟାତ୍ମିକ ଆନନ୍ଦ ପ୍ରଦାନ କରିବ।