ଶୁକ୍ରବାର ଜଗତର ନାଥ ଶ୍ରୀ ଜଗନ୍ନାଥଙ୍କ ବିଶ୍ବ ପ୍ରସିଦ୍ଧ ଘୋଷଯାତ୍ରା ଅନୁଷ୍ଠିତ ହେବ । ଏଥିଲାଗି ସମସ୍ତ ପ୍ରସ୍ତୁତି ଶେଷ ହୋଇଛି ରଥ, ପଥ, ଭକ୍ତ ସମସ୍ତେ ମହାପ୍ରଭୁଙ୍କ ଆଗମନକୁ ଅପେକ୍ଷା କରି ରହିଛନ୍ତି। ଗୁରୁବାର ଅପରାହ୍ନରେ ମହାପ୍ରଭୁଙ୍କଠାରୁ ତିନିରଥକୁ ଆଜ୍ଞାମାଳ ବିଜେ ହୋଇଛି ଏହାପରେ ତିନି ରଥକୁ ଦକ୍ଷିଣ ମୋଡ଼ କରାଯାଇ ସିଂହଦ୍ବାର ସମ୍ମୁଖକୁ ଅଣା ଯାଇଛି ଏହା ଆଗରୁ ତିନି ରଥରେ ଆଜ୍ଞାମାଳ ବିଜେ ହୋଇଥିଲା। ଏହା ପରେ ପ୍ରଥମେ ନନ୍ଦିଘୋଷ ରଥ ତା ପରେ ଦର୍ପଦଳନ ଏବଂ ଶେଷରେ ତାଳଧ୍ବଜ ରଥ ସିଂହଦ୍ବାର ସମ୍ମୁଖରେ ଲାଗିଛି ।
ଏବେ ସିଂହଦ୍ବାର ସମ୍ମୁଖରେ ତିନି ରଥ ପ୍ରସ୍ତୁତ। ଅପେକ୍ଷା କେତେବେଳେ ମହାପ୍ରଭୁ ଆସିବେ, ରଥରେ ବିଜେ କରିବେ ଶୁକ୍ରବାର କାଳିଆ ଠାକୁର ଭାଇ ଓ ଭଉଣୀଙ୍କୁ ନେଇ ମାଉସୀଘର ଅଭିମୁଖେ ଯାତ୍ରା କରିବେ ।
ସ୍ନାନ ଯାତ୍ରା ପରେ ମହାପ୍ରଭୁ ଜ୍ବରରେ ପୀଡ଼ିତ ହୋଇ ଅନବସରରେ ଥିଲେ ବୈଦ୍ୟଙ୍କ ଚିକିତ୍ସା ପରେ ସମ୍ପୂର୍ଣ୍ଣ ସୁସ୍ଥ ହୋଇ ଗୁରୁବାର ଚତୁର୍ଦ୍ଧାମୂର୍ତ୍ତୀ ନବଯୌବନ ପ୍ରାପ୍ତ ହୋଇ ଭକ୍ତଙ୍କୁ ଦର୍ଶନ ଦେଇଛନ୍ତି । ଏଥିପାଇଁ ଗୁରୁବାର ସକାଳେ ଶ୍ରୀମନ୍ଦିରରେ ଭକ୍ତଙ୍କ ଭିଡ଼ ଲାଗି ରହିଥିଲା । ଶୃଙ୍ଖଳିତ ଦର୍ଶନ ନିମନ୍ତେ ପୋଲିସ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଥିଲା ।
ଶୁକ୍ରବାର ରଥଯାତ୍ରା ପାଇଁ ଶ୍ରୀମନ୍ଦିରରେ ନୀତି ନିର୍ଘଣ୍ଟ ଅନୁସାରେ ପ୍ରସ୍ତୁତି ଆରମ୍ଭ ହୋଇ ଯାଇଛି । ଭିଡ଼ ନିୟନ୍ତ୍ରଣ ପାଇଁ ପୋଲିସ ଫୋର୍ସ ଓ ଟ୍ରାଫିକ ନିୟନ୍ତ୍ରଣ ପାଇଁ ପୋଲିସ ମୁତୟନ ହୋଇଛନ୍ତି । ଶୃଙ୍ଖଳିତ ଦର୍ଶନ ପାଇଁ ଡ୍ରୋନ୍ ମଧ୍ୟମରେ ତଦାରଖ କରାଯାଉଛି । ଜଳ, ସ୍ଥଳ ଓ ଆକାଶରୁ ରଖାଯାଇଛି ତୀକ୍ଷ୍ଣ ନଜର । ତଟରକ୍ଷୀ ବାହିନୀ ପକ୍ଷରୁ ପଇନ୍ତରା କରୁଛି ହେଲିକପ୍ଟର । ଶୁକ୍ରବାର ସକାଳ ୯ଟା ବେଳେ ତିନିଠାକୁରଙ୍କ ପହଣ୍ଡି ବିଜେ ହେବ। ଦିନ ୧୨ଟା ସୁଦ୍ଧା ତିନିଠାକୁର ରଥାରୂଢ଼ ହେବା ପରେ ଦିନ ୨ଟାରେ ଗଜପତି ମହାରାଜ ଛେରାପହଁରା କରିବେ । ଏହାପରେ ଚାରମାଳ ଫିଟାଯିବ । ପ୍ରଥମେ ଶ୍ରୀବଳଭଦ୍ରଙ୍କ ତାଳଧ୍ବଜ, ପରେ ଦେବୀ ସୁଭଦ୍ରାଙ୍କ ଦର୍ପଦଳନ ଏବଂ ଶେଷରେ ମହାପ୍ରଭୁ ଶ୍ରୀଜଗନ୍ନାଥଙ୍କ ନନ୍ଦିଘୋଷ ରଥକୁ ଭକ୍ତମାନେ ଶ୍ରୀଗୁଣ୍ଡିଚା ମନ୍ଦିର ଅଭିମୁଖେ ଟାଣିନେବେ । ସନ୍ଧ୍ୟା ସୁଦ୍ଧା ତିନିରଥ ଶ୍ରୀଗୁଣ୍ଡିଚା ମନ୍ଦିର ସମ୍ମୁଖରେ ପହଞ୍ଚିଯିବେ ବୋଲି ଆଶା କରାଯାଉଛି । ଆସନ୍ତା ମାସ ୫ ତାରିଖରେ ମହାପ୍ରଭୁ ମାଉସୀଘରେ ତାଙ୍କର ନବଦିନ ବ୍ୟାପୀ ଲୀଳାଖେଳା ସାରି ବାହୁଡ଼ିବେ । ୬ ତାରିଖରେ ରଥ ଉପରେ ସୁନାବେଶ, ୭ ତାରିଖରେ ଅଧରପଣା ଲାଗିବ ଏବଂ ୮ତାରିଖରେ ଚତୁର୍ଦ୍ଧାମୂର୍ତ୍ତି ରତ୍ନବେଦୀକୁ ବିଜେ କରିବେ ।
